Мариинаг æмæ Стыр, Новосибирскы оперæ æмæ балеты театрты солисткæ, Цæгат æмæ Хуссар Ирыстоны сгуыхт артисткæ ссыд Ирыстонмæ. Ныры дуджы хуыздæр сопранотæй иуæн абон ирон театры уыдзæн фыццаг концерт. Райсом та Беслæны культурæйы галуаны ратдзæн хæрзаудæн концерт «Джиоты Вероникæ – Беслæны сæвæллæттæн».
Программæмæ хаст æрцыдысты оперон классикæйы уацмыстæ. Джиоты Вероникæ аритæ акæндзæн Вердийы, Пуччинийы, Москаньийы, Каччинийы оперæтæй. Сценæйы йын дирижер Евгений Кирилловы разамындæй цæгъддзæн Цæгат Ирыстоны паддзахадон филармонийы оркестр.
Аивадуарзджытæм ма æнхъæлмæ кæсы æхсызгон лæвар. Æрыгон дирижер Муриты Дана акæндзæн увертюрæ Вердийы оперæмæ «Сила судьбы». Джиоты Вероникæ та азардзæн Харебаты Тимуры зарæг «Мæ Ирыстон».
Джиоты Вероникæйы курдиат æмæ аивад уарзынц æмæ йын аргъ кæнынц дунейы алы бæстæты. Зæрдиагæй æнхъæлмæ кæсынц йемæ фембæлынмæ.
Цæгат Ирыстоны та йын уæлдай аргъ кæнынц. Ирыстоны концерттæ раттын къухы бафтыд Цæгат Ирыстоны культурæйы министрады, «Медиа-группа», «Ярче»-йы æххуысæй.