филиал вгтрк государственная телерадиовещательная компания “Алания”

«Рох хæсты – рох хъæбатыртæ». Цæгат Ирыстоны гуманитарон æмæ социалон иртæстыты институты арæзт æрцыд наукон-практикон конференци. Баст уыд фыццаг дунеон хæсты райдайæныл 100 азы кæй сæххæст, уыимæ. Бацæттæ йæ кодта фæсивæды хъуыддæгты, физкультурæ æмæ спорты министрад. Конференцийы архайдтой республикæйы наукон интеллигенцийы, æхсæнадон организациты минæвæрттæ, студенттæ, скъоладзаутæ. Фæсивæд бацæттæ кодтой докладтæ уыцы хæсты хъæбатырты тыххæй. Се `хсæн Хетæгкаты Василий, Хоранты Созырыхъо, Мыстулаты Елмырзæ. Фембæлды архайджытæ куыд загътой, афтæмæй ацы цаумæ фаг æргом здæхт нæй. Уыимæ дзы ирон адæм сæхи хъæбатырæй равдыстой. Уыцы хъуыддаг сраст кæнын, æмæ бæлвырддæр раиртасын фыццаг дунеон хæсты истори – уый у наукон-практикон конференцийы сæйраг нысан.

Тыджыты Сослан, РЦИ-Аланийы фæсивæды æфсæддон-патриотон хъомылады центры хайады хицау: «Уый тынг æхсызгон у, абон Ирыстоны фæсивæд уыцы фарстамæ се `ргом кæй раздæхтой, кæй бакуыстой уыцы фарстатыл. Абоны фæсивæд кусдзысты, цæмæй мауал уой рох хæстытæ, сæ туг чи фæкалдта, уыдоны рухс нæмттæ хъуамæ рох ма уой. Сывæллæттæ бацæттæ кодтой тынг лæмбынæг докладтæ уыцы фарстатæм гæсгæ».