филиал вгтрк государственная телерадиовещательная компания “Алания”

Цæгат Ирыстоны ихын галуаны уыд Мæхъæлы республикæйы хоккейы командæйы фыццаг тренировкæ. Сыхаг республикæйы хоккейы командæ ис, фæлæ сын нырма нæй ихын галуан. Хъуамæ йæ арæзт фæуой августы. Уымæ гæсгæ Мæхъæлы республикæйы спорты министрад курдиат æрбарвыста Цæгат Ирыстоны нациты ахастдзинæдты фарстаты министрадмæ, цæмæй сын бар радтой Дзæуджыхъæуы ихын галуаны тренировкæтæ кæнынæн.

Тренировкæтæ кæндзысты къуыри иу хатт. Семæ та кусдзысты дыууæ республикæйы тренертæ. Зымæгон спорты хуызты сывæллæтты спортивон скъолайы директор Фидараты Асланы ныхæстæм гæсгæ, сыхаг республикæты сывæллæттæ Дзæуджыхъæумæ кæй цæуынц, уый хорз у. Афтæмæй Кавказы хоккей кæны парахатдæр. Уæвгæ Цæгат Ирыстоны ихын галуан нымад у хуыздæрыл æмæ йæм тренировкæтæ кæнынымæ арæх ссæуынц иннæ республикæты минæвæрттæ. Цæгат Кавказы иннæ республикæтимæ абаргæйæ, Дзæуджыхъæуы командæ у фæлтæрдджындæр æмæ ныр дæр цы бацамоной, цæуыл сахуыр кæной, уый сын ис.