Цæгат Ирыстоны, кæсаджы куыст кæнæн кæм ис, ахæм дæтты иумæйаг фæзуат у мин æмæ 610 гектары. Цæмæй сæ æххæстæй пайда кæной, уый тыххæй цалдæр азы размæ республикæйы
Дзодзиты Зояйæн йæ бон райдайы цады цур. Афтæ мачи банхъæлæд æмæ йæ фæллад суадзынмæ æрбацæуы. Кæны уæззау, фæлæ йæ зæрдæмæ чи цæуы, ахæм куыст. Кæддæр спъирты куыстгæнæн заводы кусæг ныр кæны кæсаджы куыст.
Кæсаг дарыны куыст уæззау кæй у, уымæ гæсгæ Зояйы бахъæуы бирæ цæуылдæрты ахуыр кæнын. Фæлæ зивæг нæ кæны. Æмбары йæ – цас фылдæр базона, уыйас фæхуыздæр уыдзæн сæ куыст æмæ продукцийы рауагъд. Ныртæккæ уал заводы парахат кæнынц карп, толстолобик, белый амур æмæ æндæр кæсаджы хуызтæ. Фæнд кæнынц зынаргъ кæсаджы мыггаг дæр уадзын, фæлæ сæ браконьертæ ныккуынæг кæнынц. Зæгъæм, мæнæ ацы кæсагахсæн хыз дæр уыдон сæвæрдтой æмæ иу хсæвмæ æрцахстой 20 кг кæсаг. Ахæм хызтæ та иу æмæ дыууæ не ссарынц.
Алыг кæнын ма сæ хъæуы иу ахсджиаг фарста. Заводы нæ фаг кæны специалисттæ. Зын ссарæн сты студенттæ дæр, никæй фæнды иннæ регионтæм ахуыр кæнынмæ цæуын. Кæсæгдарæджы куысты бирæ фыдæбон кæй ис, уый дæр сæ зæрдæмæ нæ цæуы. Æмæ сæм æрбацæуынц стæмтæ. Ныртæккæ заводы кусы 20 адæймаджы.
Бруты кæсагдарæн хæдзарады фæлтæргай кæнынц куыстуат йæ къæхтыл слæууын кæныны мадзæлттæ. Бæстыхæйттæм, донуæттæм базилыны куыстытимæ цæуы кæсæгты инкубаци дæр. Сæ бон у хæрзмыггаг кæсаджы мыггаг уадзын дæр. Сæ хъуыдымæ гæсгæ цыдыр рæстæджы фæстæ сæ бон уыдзæн иу гектарæй 1-1,5 тоннæйы кæсаг ахсын. Бруты нысан кæнынц 200 тоннæйы алыхуызон кæсаг схъомыл кæнын.
Уымæй уæлдай ма заводы цæттæ кæнынц цадтæ, цæмæй адæмæн сæ бон уа æрбацæуын кæсаг ахсынмæ æмæ сæ фæллад суадзынмæ.
Цæгат Ирыстоны, кæсаджы куыст кæнæн кæм ис, ахæм дæтты иумæйаг фæзуат у мин æмæ 610 гектары. Цæмæй сæ æххæстæй пайда кæной, уый тыххæй республикæйы фидаргонд æрцыд программæ. Ныртæккæ цы мадзæлттæ аразынц, уыдон ныфс дæттынц, кæсаджы куыст кæй фæахадгæдæр уыдзæн, уымæй.
Зындзинæдтæ ницæмæ даргæйæ, заводы хицау Дзодзиты Зоя фæнд кæны йæ куыстуат рапарахат кæнын. Хъуамæ балхæной ног кусæнгæрзтæ, базилой заводы алфæмблай фæзуатмæ, цæмæй дзы сæ бон баулæфын уа æрбацæуджытæн дæр, кусджытæн дæр. Йæ хъудымæ гæсгæ фæлладуадзæн бынæтты фæрцы хи бахъахъхъæнæн ис браконьертæй дæр, адæмы цур хызтæ ничи æвæрдзæн.
Сæ сæйрагдæр хæс та у Ирыстоны фæлхасгæнджыты бафсадын, стæй йæ иннæ регионты адæмæн уæй кæнын.
