Цæгат Ирыстоны кусын райдыдта экологон рæзты республикон программæ. Йæ саразыны тыххæй йе `рвылазон ныстуаны уынаффæ рахаста республикæйы сæргълæууæг Мамсыраты Таймураз.
Цгъойты Руслан, Росприроднадзоры юридикон хайады специалист: «Кæй æрцахсæм, уыцы куыстуæтты бафхæрæм. Æмæ фæархайæм, цæмæй сæ куыст æмбæлгæ уагыл уа, уый тыххæй».
Росприроднадзоры бæрæггæнæнтæм гæсгæ æрдзмæ чъизи буаргъæддæ чи æппары, уыдонæн сæ фылдæр сты хуызджын металлургийы куыстуæттæ, промышленнон æмæ коммуналон хæдзарады къабазы куыстуæттæ, сыгъдæггæнæнтæ. Ацы хыгъд ма ис фæфылдæр кæнæн.
Къаддæр зиан уæлдæфæн нæ хæссынц машинæтæ дæр. Бонæй-бонмæ сæ нымæц кæны фылдæр. Ивгъуыд азы Цæгат Ирыстоны машинæтæ фæфылдæр сты 5-6 мин иуæджы. Специалистты нымадмæ гæсгæ, машинæтæй æрвылаз уæлдæфмæ бахауы 70 мин тоннæйæ фылдæр чъизи хауæтдзæгтæ.
Республикæйы экологон рæзты программæйыл бакусыныл фарон ныхас цыд Цæгат Ирыстоны сæргълæууæг Мамсыраты Таймуразы ныстуаны.
Проектыл бакуыстой æрдзхъахъхъæнынады комитеты, экологты, районты сæргълæуджыты æмæ æхсæнады архайдимæ. Комитеты сайтмæ алы адæймагæндæр йæ бон бахæссын уыди йæ фæндонтæ æмæ хъуыдытæ. Программæ ацы азæй царды рацыд.
Цгъойты Таймураз, Росприроднадзоры хайады хицау: «Æхцайæ рæвдз куы уæм, уæд нæ куыст ацæудзæн хорз. Нæ размæ цы хæстæ æвæрд ис, уыдон сæххæст кæндзыстæм 2017-æм азмæ».
Уæлдæфмæ зианхæссæг буаргъæдтæ уадзын, цæугæдæттæм чъизи хауæтдзæгтæ æппарын, æнæзакъон бырондæттæ арзын. Ацы хъуыддæгтимæ тох кæндзысты ног программæ æххæст кæнгæйæ.
Сæйраг домæнты хсæн ма ис стæм чи у, ахæм цæрæгойты хуызтæ бахъахъхъæнын. Републикæйы экологон рæзты программæ арæзт у 4 азæн.
Касаты Нæирæ
