филиал вгтрк государственная телерадиовещательная компания “Алания”

Цæгат Ирыстоны куыстдæттыны департаменты кусджытæ, сæ сæргъы комитеты разамонæг Къаболаты Ларисæ, афтæмæй бабæрæг кодтой Украинæйæ Урсдонмæ æрбалидзæг адæмы. 

Пансионаты арæх вæййынц. Ацы хатт сæ цыды нысан уыд æрбалидзæг адæмæн куысты бынæттæ ссарынæн баххуыс кæнын. Украинæйы цæрджытæн сæ фылдæрмæ ис хæххон æмæ æрзæткъахæн промышленносттимæ баст дæсныйæдтæ. Сæ дæсныйадмæ гæсгæ сын куыст ссарын кæй нæ бантысдзæн, уый æмбарынц, фæлæ сæ уæддæр æгуыстæй бадын нæ фæнды. 

Департаментæн бастдзинæдтæ ис Кемеровы облæстимæ, Сахалинимæ æмæ ма, шахтæтæ кæм ис, уыцы регионтимæ. Кæй фæнда уыдонæн баххуыс кæндзысты уыцы регионты куыст ссарынæн. Ныридæгæн уал 60 адæймаджы ныффыстой курдиæттæ иннæ регионтæм сæ арвитыны тыххæй. Иннæтæ уал сæхицæн куыст агурынц департаменты мобилон машинæйы. Сæ бон равзарын у 400 вакансийæ. 

Украинæйæ Цæгат Ирыстонмæ ралыгъд 500 адæймаджы. Сæхимæ сæ куыстмæ райсыныл разы сты завод «Крон», Æрыдоны хъæууон-хæдзарадон кооператив, «Мастер-Прайм Березка» æмæ æндæр организацитæ.

Æрбалидзæг адæмимæ ма ныхас кодтой æнæнхъæлæджы уавæрты министрады. Дзуапп лæвæрдтой адæмы фарстатæн.