Министрадты æмæ ведомствоты разамонджытæ фембæлдысты Даргъ-Къохы, Кæрдзыны æмæ æндæр хъæуты цæрджытимæ. Ныхас кодтой сæ риссагдæр фарстатыл. Зæгъæм, цалдæр хъæуы нуазыны дон цæуы къуылымпытæгæнгæйæ.
Нуазыны доны хъуыддаг Кæрдзыны цæрджытæн у æппæтæй ахсджиагдæр. Ныр сын фадат фæци уыцы фарста артаг, энергетикæ æмæ цæрæн-коммуналон хæдзарады министр Уазиты Хъазыбегæн æмæ архитектурæ æмæ арæзтадон политикæйы министр Алидзаты Хъазыбегæн раттын.
Биазырты Мæирбег, Кæрдзыны цæрæг: «Ныртæккæ нуазыны доны фарста бирæты тыхсын кæны. Махæн нæ бон цы у, уый кæнæм. Фæлæ æрмæст нæхи хъарутæй архайын нæ бон нæу».
Уазиты Хъазыбеджы ныхæстæм гæсгæ, нуазыны доны фарста карзæй канд Кировы районы нæ лæууы. Тыхсын кæны иннæ районты цæрджыты дæр. Ныр Кæрдзыны хъæуы цæрджытимæ фембæлды фæстæ арæзт рцæудзæн сæрмагонд къамис. Кусдзæн ацы фарста алыг кæныныл.
Елхоты цæрæг Нæкуысаты Фаинæ дæр куы фехъуыста, министртæ ныццæудзысты, уый, уæд йæ риссаг фарсатимæ атагъд кодта бынæттон администрацимæ. Базилинаг уыд йæ хæдзары сæр.
Нæкуысаты Фаинæ, Елхоты цæрæг: «Райсомæй мæм æрбадзырдтой, скъоладзаутæ, дам, дæм фæцæуынц, æмæ сæм ракæс, зæгъгæ. Уый размæ мын отсев æркалдтой, ныр дæр та æххуысимæ æрбацыдысты, æмæ сын бузныг. Афтæ ма бирæ азты æххуысхъом куыд уой, уый сын мæ зæрдæ зæгъы».
Уæвгæ, министртæ Кировы районы кусынц ныр къуырийы дæргъы. Уыцы мгъуыдмæ сын бантыст бирæ хъуыддæгтæ саразын. Кæддæр ацы бæстыхай уыд Ираны колхозы бæрны. Дæс азы размæ дзы скодтой спортивон зал. Æрæджы цæрджытæ, фæсивæды хъуыддæгты, физкультурæ æмæ спорты министр Челæхсаты Рустемимæ фембæлгæйæ ракуырдтой зал спортивон дзаумæттæй сифтон кæнын. Фондз боны фæстæ Ираны спортивон залы фæзындысты тренажертæ æмæ штангæтæ. Афæдзы размæ Кировы районы рынчындоны, бындурон цалцæджы фæстæ байгом кодтой хирургион æмæ терапевтон хайæдтæ. Цалцæггæнæн куыстытæ цыдысты, æнæниздзинадхъахъхъæнынад ног хуызы рацаразыны федералон программæ æххæст кæнгæйæ. Ныр рынчынты ныхæстæм гæсгæ, сын арæзт æрцыдысты æмбæлгæ уавæртæ.
Уæдæ хостæй дæр цух нал æййафынц.
Азиаты Светланæ: «Хостæ дæр нын ис, дохтыртæ дæр нæм лæмбынæгæй кæсынц. Иу ныхасæй, алцæмæйдæр æххæст стæм».
Абон ма Кировы районмæ ацыд ноджыдæр иу разамонджыты къорд. Бынаты базонгæ уыдзысты цæрджыты лыггæинаг фарстатимæ, æмæ сæ бацархайдзысты æвæсиатæй алыг кæныныл.
