филиал вгтрк государственная телерадиовещательная компания “Алания”

Архайынц дзы 19 къорды Уæрæсейы регионтæй, хæдбар паддзахадты хæлардзинады бæстæтæй, стæй Японийæ. Хореографион фестиваль цæудзæн æнæхъæн къуыри. Сывæллæттæ æвдисдзысты сæ арæхстдзинад, уыимæ ма сын уыдзæн дæсныйад æвдисæг ахуыртæ æмæ экскурситæ. Ны та уал кафджыты къордтæ Ирон академион театры сценæйы равдыстой сæ рæсугъддæр кæфтытæ.

Сывæллæтты хореографион къордты форум байгом кодтой паддзахадон ансамбль «Алан»-ы артисттæ. Акодтой «Кавказы хæлардзинад»-ы кафт. Ахæм уыд сæ ныстуан сæ кæстæр æмбæлттæн. Æмæ æцæгæй дæр уый у 4-æм æппæтадæмон фестиваль «Кавказы кафджыты шоу – хæлрдзинады кафты» сæраг хъуыды – балымæн кæнын канд Цæгат Кавказы æмæ Уæрæсейы нæ, фæлæ ма дунейы адæмты дæр. Æмæ уæвгæ, фестиваль фыццаг хатт арæзт куы æрцыд, уæд дзы архайдта 6 къорды, ныр та Цæгат Ирыстонмæ ссыдысты 19 хореграфион коллективы.

Цырд кавказаг кæфтытæ, уырыссаг ирд хореграфион уацмыстæ, аргъæутты бындурыл æвæрд постановкæтæ. Алыхуызон æмæ рæсугъд кæфтытæ бахъæлдзæг кодтой аивадуарзджыты зæрдæтæ. Фыццаг хатт фестивалы архайы сывæллæтты ансамбль Японийæ дæр. Кафты взагыл дзургæйæ, курдиатджын сабитæ ссардтой фæндаг адæмы зæрдæтæм – акодтой куклаты кафт.

Фестивалы фыццаг бон йæ архайджытæ равдыстой сæ аивдæр кæфтытæ, сæ къорды архайд ирдæй кæм зыны, ахæмтæ. Уыимæ ма алы ансамбль дæр Ирон театры сценæйы акæндзæн дыууæ кафты. Хуссар Ирыстоны сывæллæтты хореографион ансмабль «Ирон» ацы фестивалы ахайы ныр даккаг хатт. Куыд зæгъынц, афтæмæй сæ зæрдæмæ тынг цæуы.

Фестивалы программæ у алывæрсыг. Иу къуырийы дæргъы йæ архайджытæн уыдзæн экскурситæ æмæ дæсныйад æвдисæг ахуыртæ. Ныр та уал хореографион бæрæгбоны архайджытæм Ирон театры фойейы æнхъæлмæ каст цымыдисаг лæвар.

Фестивалы архайджытæн æмæ уазджытæн ам арæзт æрцыд равдыст. Ис дзы æрмдæсныты куыстытæ, адæмон музыкалон инструменттæ, разгом къабатæ æмæ ма раст фыццаг фестивальтæй хуызистытæ дæр.

Дарддæр фестивалы архайджытæн уыдзæн сфæлдыстадон ерыс. Æрыгон курдиæтты дæсныдзинад та бæрæг кæндзысты жюрийы уæнгтæ. Сты зындгонд кафджытæ, бæстæйы хореографион ахуыргæнæндæтты педагогтæ. Жюрийы сæргълæууæг та у Уæрæсейы сгуыхт æмæ Цæгат Ирыстоны адæмон артист Владимир Моисеев, Михаил Годенкойы номыл Сыбыры кафты паддзахадон академион ансамблы разамонæг.

Ног хæлæрттæ æмæ æмæ хъæлдзæг зæрдæйы ахаст. Фестивалы архайджытæн хореграфион форум у æцæг бæрæгбон. Конкурс цæудзæн æнæхъæн къуыри.

Гугкаты Иринæ