Ахуыргæнæндонмæ æрбахуыдтой республикæйы скъолаты ахуырдзауты æмæ ахуыргæнджыты. Абитуриенттæн радзырдтой, ацы уæлдæр скъолайы сын цавæр гæнæнтæ уыдзæн, уый тыххæй. Фæсивæд бабæрæг кодтой факультеттæ, аныхас кодтой ахуыргæнджытимæ æмæ студенттимæ. Ахуырады управлениты сæргълæуджытæн æмæ скъолаты директортæн та уыдис фембæлд ахуырады æмæ наукæйы министр Огъуаты Аланимæ æмæ университеты ректор Созанаты Валерийымæ.
Туаты Камиллæ, абитуриенткæ: «Æз уыдтæн ирон филологийы факультеты. Мæ зæрдæмæ тынг фæцыдис. Ардæм мæ фæнды ахуыр кæнынмæ бацæуын. Абон нын радзырдтой, цавæр фæлварæнтæ хъæуы радтын, цæмæй ардæм бацæуай».
Созанаты Валерий, Цæгат Ирыстоны паддзахадон университеты ректор: «Фæнды нæ, цæмæй феной цы уавæртæ нæм ис ахуырæн, наукон куыст кæнынæн. Цæмæй фæсивæд куы хъуыды кæной, цы кусдзысты дарддæр, уæд зоной, ахæм университет нæм кæй ис, ис дзы хорз адæм, лабораторитæ, цæмæй сын æнцондæр уа равзарын, кæм ахуыр кæндзысты дарддæр».