Фыссæм иронау. Цæгат Ирыстоны паддзахадон университеты ЮНЕСКО-йы залы арæзт æрцыд æппæтдзыллон диктант ирон æвзагæй. Фыццаг хатт æй фыстой 2 диалектыл – иронау æмæ дыгуронау.

Хицауады сæрдар Такъоты Сергей кæсы Джыккайты Шамилы радзырд «Нæртон лæг – Нæртон намыс». Глобалон диктант фыссынц 200 адæймагæй фылдæр. Дзæуджыхъæуы 13-æм скъолайы ахуыргæнæг Къадзты Иринæ куыд зæгъы, афтæмæй текст орфографимæ гæсгæ æнцон у, зындæр уыдысты пунктуацийы фарстатæ.
Къадзты Иринæ, Дзæуджыхъæуы 13-æм скъолайы ахуыргæнæг: «Уыдис дзы бирæ вазыгджын хъуыдыйæдтæ, домгæ вазыгджын. Уымæ гæсгæ мæхæдæг дæр дызæрдыг кодтон, кæм хъæуы сæвæрын къæдзыг æмæ афтæ дарддæр. Комкоммæ ныхас дæр дзы уыдис, бавæргæ дзырдтæ, сидæнтæ, æмæ уыдон æнцондæр сты».
Сæ зонындзинæдтæ ирон æвзагæй сбæлвырд кæныны фадат уыд æрмæст республикæйы цæрджытæн нæ. Æппæт дунейы ирæттæн интернеты трансляцийы фæрцы сæ бон уыд глобалон диктант ныффыссын. Ацы аз фыццаг хатт ахуырадон акци арæзт æрцыд дыгурон диалектыл дæр. Диктанты архайджытæ фыстой Æгъуызарты Саукуыдзы радзырд «Хъурройтæ». Гуйты Георгий куыд зæгъы, афтæмæй йын дыгуронау текст æнцондæр фыссын уыд.
Гуйты Георгий, глобалон диктанты архайæг: «Мæ зæрдæмæ тынг фæцыд ацы акци. Фæндыд мæ базонын, хорз зонын мадæлон æвзаг. Уайтагъд дæр сфæнд кодтой, кæй æрбацæудзынæн, æмæ ныффысдзынæн».
Скъоладзаутæ, студенттæ, филологтæ. Мадæлон æвзагыл диктант ныффыссын у æхсызгондзинад, зæгъынц акцийы архайджытæ. Такъоты Сергей зæрдæ бавæрдта, иннæ аз æй йæхæдæг дæр кæй ныффысдзæн, уымæй.
Такъоты Сергей, РЦИ-Аланийы Хицауады сæрдар: «Ам бæрæггæнæнтæ не `вæрынц. Кæйдæр фæнды йæ мадæлон æвзаг хуыздæр базонын, ацы акцимæ гæсгæ равдисын, не `взаг кæй хъæуы. Æхсызгон уыдис бирæ æрыгон фæлтæр дзы кæй уыдис, уый. Мæнмæ гæсгæ тынг хъæугæ акци у».
Диктанты хатдзæгтæ сбæрæг уыдзысты къуырийы фæстæ. Куыстытæ равæрдзысты ахуырады æмæ наукæйы министрады сайты edu15.ru-йы. Уым уыдзысты диктантты текстытæ дæр. Афтæмæй, интернеты фæрцы акцийы чи архайдта, уыдон сæ куыстытæ сбæлвырд кæндзысты сæхæдæг.
Хъайтмазты Дзерассæ
