филиал вгтрк государственная телерадиовещательная компания “Алания”

Экономикон куыстуæттæн æххуыс кæнын – уый у республикæйы закъонæвæрынады сæйрагдæр архайды хуызтæй иу. Цæгат Ирыстоны Парламенты сæрдар Алексей Мачнев депутаттимæ бабæрæг кодта завод «Радуга». Куыстуат архайы йæ райрæзтыл. Фыццаджыдæр ам кусæнгæрзтæ аразынц æфсæддон промышленностæн, нырыккон радиолокацион системæтæн æмæ метеостанцæтæн. Заводы нысан кæнынц метеолокатортæ аразын дæр. Сæ фæрцы цалдæр минутмæ исæн уыдзæн 250 км радиусы бæрæггæнæнтæ. Ахæм ног кусæнгæрзтæ тынг хъæуынц. Æмæ, чи зоны, нæ завод уыдзæн иунæг, чи сæ араздзæн, ахæм. Метеолокатор аразыныл кусы «Радуга» – йы æнæхъæн коллектив дæр. Уымæй дарддæр куыстуаты райдыдтой медицинон техникæйы кусæнгæрзтæ аразын: стерилизатортæ, хирургон цъирæнтæ, ингалятортæ. Фæлæ заводы æфсæддон заказтæ фылдæр кæй кæнынц, кусджытæ та дзы кæй нæ фаг кæны, уымæ гæсгæ куыст цæуы къуылымпытимæ. Заводы разамындæн æндæр гæнæн нал ис, æмæ куыстмæ исын райдыдтой хæрзæрыгæтты дæр, кæд сæм фæлтæрддзинад нæй, уæддæр.