Сæ иу у Æрыдоны рæвдауæндон «Æз мæхæдæг». Цы ног методикæмæ гæсгæ дзы кусынц, уымæй бирæтæ æппæлынц, фæлæ рæвдауæндон къуылымпыдзинæдтæ æййафы финансон æгъдауæй.
Социалон къабазы та æхца кусын æнцон нæу. Уымæ гæсгæ, хи куыстуат æрæджы чи байгом кодта, уыцы амалхъом адæмæн баххуыс кæнынæн ис паддзахадон программæтæ. Фæлæ сæ спайда кæнын сеппæт нæ зонынц.
Саида Бабаджанова сывæллæттимæ ног методикæмæ гæсгæ кусынмæ рагæй бæллыд. Ныййарæджы капиталы æмæ цалдæр кредиты фæрцы байгом кодта хи хъуыддаг. Ныртæккæ йæ рæвдауæндон «Æз мæхæдæг»-мæ цæуы дыууын сывæллонæй фылдæр. Алцыдæр хорз, фæлæ коммуналон лæггæдтæн, зæгъæн ис, дывæрæй фидын йæ бон нæу. Æрвылмæйон фиддонтæ фæкъаддæр кæныны тыххæй Саида йæ курдиат бахаста Æрыдоны администрацимæ. Специалисттæ йын бацархайдтой баххуыс кæныныл. Ссардтой хъæугæ закъон, фæлæ йæ царды куыд рауадзой, уый дзы амынд нæ разынд. Социалон куыстгæнæг амалхъом адæймаг хъуамæ пайда кæна паддзахадон субсидитæй. Уый тыххæй æрæмбырд кæнын хъæуы гæххæттытæ, хъуамæ сæм æркæсой æххæстгæнæн хицауады оргæнтæ. Кæд сæ растыл банымайой, уæд адæймагæн федералон бюджетæй радих кæндзысты 6 сæдæ мин сомы онг.
Адæмæй бирæтæ нæ фæзонынц, ацы закъон, æмæ сæ куыстуæттæ банкротмæ æрцæуынц. Ахæм рæдыд ма æруадзыны тыххæй, куыстуаты разамонæг хъуамæ афоныл бацæуа специалистмæ, æмæ дзы райса консультаци.
