Æхца кæй нæ фаг кæны, уый тыххæй ацы хъуыддаджы æдзухдæр сæвзæры къуылымпыдзинæдтæ. Республикæйы разамынд архайы уавæр фæхуыздæр кæныныл. Фæлæ уыцы мадзæлттæ фаг не сты.
Æхца кæй нæ фаг кæны, уый тыххæй ацы хъуыддаджы æдзухдæр сæвзæры къуылымпыдзинæдтæ.
Республикæйы разамынд архайы уавæр фæхуыздæр кæныныл. Фæлæ уыцы мадзæлттæ фаг не сты.
Хъуппеты Дзантемыр та радон хатт афтекæй
раздæхт æнæ хостæй. Пенсиисæгмæ, дыккаг къæпхæны инвалидмæ ис цалдæр
низы: хандроз, аденома, хъыгдары йæ йæ зæрдæ дæр. Льготæтæм гæсгæ
Дзантемыр хостæ рагæй исы. Куыд зæгъы, афтæмæй арæх йæ къухы нæ бафтынц.
Хъуппеты Дзантемыр: «Куыд хъуамæ лæг
сдзæбæх кæна йæхи. Ныр октябры мын рафыстой зæрдæйы хос, æмæ сæ æлхæнын
мæхи æхцайæ. Афтæ у хъуыддаг».
Республикæйы льготæтæм гæсгæ хостæ исыны
бар ис 100 мин адæймагæй фылдæрæн. Æнæниздзинадхъахъхъæнынады
министрады куыд нысан кæнынц, афтæмæй, 2005-æм азы хостæй æххæст кæнынæн
цы программæ фидаргонд æрцыд, уый ахадгæ разынд. Æрмæст ацы аз
республикон бюджетæй дихгонд æрцыд 120 милуан сомы, федералонæй та 190.
Фæлæ, уæддæр хостæ се ппæт фаг нæ кæнынц. Программæ куыд æххæстгонд
цæуы, уый бæлвырд кæны æнæниздзинадхъахъхъæнынадмæ цæстдарды федералон
службæйы цæгатирыстойнаг управлени. Ам куыд зæгъынц, афтæмæй фæстаг азты
уавæр фæхуыздæр, фæлæ ма уæддæр ис къуылымпыдзинæдтæ.
Дзуццаты Азæ,
æнæниздзинадхъахъхъæнынадмæ цæстдарды федералон службæйы цæгатирыстойнаг
управленийы хайады специалист-эксперт: «Республикон бюджетæй фаг
фæрæзтæ дихгонд нæ цæуы, рынчынтæ сæ хостæ афоныл нæ райсынц, бавдыстытæ
куыд æмбæлы, афтæ æххæстгонд не рцæуынц, афтек æмæ рынчындонты хсæн.
Бæлвырд у, ацы программæйы руаджы нæ республикæйы льготæ кæмæн æмбæлы,
уыдон ифтонг æрцыдысты æнæмæнг чи хъæуы, уыцы хостæй».
Сæрмагонд программæ кусы ныр 7 азы.
Цæгат Ирыстоны йæ æххæст кæнынц 80 дзæбæхгæнæн уагдоны, льготæтæм гæсгæ
хостæ исынц 37 афтеччы. Фæлæ республикæйы цы мадзæлттæ арæзт цæуынц,
уыдон фаг не сты. Специалистты хъуыдымæ гæсгæ, цæмæй уавæр фæхуыздæр уа,
уый тыххæй хъæуы системæ ивын.
Лæвар хосты уавæр уæззау у бæстæйы æппæт
субъектты дæр. Ныртæккæ Уæрæсейы Хицауады кусынц сæрмагонд
программæйыл. Хуыйны «Адæмы хостæй æххæст кæныны стратегийы райрæзт
2025-æм азмæ». Чи зоны, йе руаджы ацы фарста кæронмæ лыггонд æрцæудзæн.
