филиал вгтрк государственная телерадиовещательная компания “Алания”

Сывæллæтты æнæниздзинады наукон центры специалисттæ республикæйы уыдзысты 4 боны. Иу æмæ рдæгаздзыд Александрæ у Сывæллæтты хæдзары хъомылгæнинаг. Ам ис йæ райгуырдæй нырмæ. Сывæллонæн хъыгдард у йæ нервыты системæ, уымæ гæсгæ йын зын у дзурын. Александрæйы федтой сывæллæтты æнæниздзинады наукон центры специалисттæ – невролог, педиатр æмæ кардиолог. Дохтыр-невролог Бэлла Барсагова куыд зæгъы, афтæмæй, чи зоны сывæллоны дæрддæр дзæбæх кæндзысты Мæскуыйы.

Бэлла Барсагова, Уæрæсейы медицинон наукæты академийы сывæллæтты æнæниздзинады наукон центры невролог: «Сывæллонæн йæ бон нæу дзурын. Мах хъуыдымæ гæсгæ Александрæйæн йе нæниздзинад иртасын хъæуы мах центры. Уыимæ нæ хъæуы генетикон анализ райсын дæр».

Цæгат Ирыстоны мæскуыйаг специалисттæ сæ куыст райдыдтой сывæллæтты хæдзары. Ам ис 36 хъомылгæнинаджы 3 мæйæ 4 азы онг кæуыл цæуы, ахæмтæ. Бирæтæм сæ ис зæрдæйы æмæ нервыты системæйы низтæ, стæй сывæллæтты церебралон паралич. Сæ фылдæрæн сæ баххуыс кæнæн ис Цæгат Ирыстоны рынчындæтты, зæгъы сывæллæтты æнæниздзинады наукон центры хайады сæргълæууæг Акъоты Юрий.

Акъоты Юрий, сывæллæтты æнæниздзинады наукон центры хайады сæргълæууæг: «Сбæрæг кодтам сывæллæттæн диагностикæ куыд кæнын хъæуы, уый. Дыууæ сывæллонæн та скæнын хъæуы генетикон анализ. Æмæ фæстæдæр диагностикæйы бæрæгггæнæнтæм гæсгæ сбæрæг уыдзæн, дзæбæх кæнынмæ немæ кæй аласдзыстæм, уыдоны».

Генетикон анализтæ конд æрцæудзысты наукон центры, бахардз сыл кæндзысты федералон дзæбæхгæнæн уагдоны фæрæзтæ. Цæгат Ирыстоны сывæллæтты хæдзары кусджытæ куыд зæгъынц, афтæмæй ам ахæм фадæттæ нæй. Уый тыххæй сæ мæскуыйаг æмкусджытæм тынг æнхъæлмæ кастысты.

Бадзиаты Татьянæ, Цæгат Ирыстоны сывæллæтты хæдзары педиатр: «Махмæ алыхуызон низтæ ис сывæллæттæм, æмæ офтальмолог, невропотолог æмæ кардиолог чи рекомендацитæ радтой, уыдон кæндзыстæм. Ис кæйы ласын куы хъæуа центрмæ, уæд уыдоныл дæр бакусдзыстæм. Цæмæй сывæллæттæн сæ цард æмæ се нæниздзинад хъорз куыд уа, ууыл кусдзыстæм дарддæр дæр».

Фидараты Заремæ, Цæгат Ирыстоны сывæллæтты хæдзары хъомылгæнæг: «Цы дохтыртæ нæм æрбацыд, уыдон ахæм рынчынтæ бирæ федтой, сæ фæлтæрддзинад у фылдæр æмæ нæм ныр æрбацыдысты, æмæ нын зæрдæ бавæрдтой, кæй сæм фæкæсдзысты, уый».

Цæгат Ирыстоны сывæллæтты æнæниздзинады наукон центры кусджытæ уыдзысты 4 боны. Бæрæг кæндзысты республикæйы сывæллæтты хъæдзæртты хъомылгæнинæгты æнæниздзинад.
«Мæскуыйаг дохтыртæ, æркасты хатдзагтæм гæсгæ скæндзысты, уæззау низтæ кæмæ сбæрæг ис, уыцы сывæлæты номхыгъд. Се ппæтæн дæр сæ æмбæлгæ дзæбæхгæнæн мадзæлттæ кæндзысты Мæскуыйы, сывæллæтты æнæниздзинады наукон центры».

Гугкаты Иринæ