Нæ республикæмæ кусæг балцы ссыд ахуырады къабазмæ цæстдарды федералон службæйы разамонæг Сергей Кравцов. Фембæлд ын уыд Цæгат Ирыстоны сæргълæууæг Мамсыраты Таймуразимæ.
Сергей Кравцовы ссыд баст уыд уæлдæр ахуыргæнæндæттимæ куыстимæ, æмæ 2014-æм азы иумæйаг паддзахадон фæлварæн дæттынимæ. Уымæй уæлдай, архайдта скъолаты директортимæ æмæ уæлдæр ахуыргæнæндæтты разамонджытимæ, ахуырад æмæ наукæйы, стæй физкультурæ æмæ спорты министртимæ æмбырды, разамынд ын лæвæрдта республикæйы хицауады сæрдар Такъоты Сергей. Мæскуыйаг уазæг куыд бафиппайдта, афтæмæй иумæйаг фæлварæны хатдзæгтæм гæсгæ Цæгат Ирыстонмæ иннæ регионтимæ абаргæйæ ис æппæтæй къаддæр фиппаинæгтæ. Хицауады сæрдар йæ хъуыдытæ загъта рауагъдонты зонындзинæдтæн раст аргъ кæныны тыххæй. Уымæн æмæ республикæйы фидæн уымæй аразгæ у. Æмбырды хаст æрцыди фæндон, рауагъдонтæн уыцы иу рæстæг дыууæ паддзахадон фæлварæны дæттыны тыххæй – скъолайы аттестацион æмæ уæлдæр ахуыргæнæндонмæ бацæуынæн. Ахуыргæнджытæ разыйы дзуапп радтой æрмæст уæлдæр ахуыргæнæндонмæ фæлварæны тыххæй.
