филиал вгтрк государственная телерадиовещательная компания “Алания”

Цæгат Ирыстоны цæуы профилактикон операци «Æнахъом сывæллæттæ». Пъæлицæйы кусджытæ æхсæвыгон зилынц уынгты æмæ бæрæг кæнынц æнахъом сывæллæттæ æмæ æрыгæттæ æнæ ныййарджытæй æмæ цæстдарджытæй кæм æмбырд кæнынц, уыцы бынæттæ. 

Ацы хатт пъæлицæйы кусджытимæ рейды уыдысты милхъуыддæгты министрады цур Æхсæнадон Советы уæнгтæ. Федералон закъонмæ гæсгæ регионалон оргæнтæ хъуамæ сæ цæст дарой, изæры 10 сахатæй райсомы 6 сахатмæ æнахъом сывæллæттæ æнæ хистæртæй æхсæнадон бынæтты куыд нæ уой. уымæ

«Уый та уымæн, – зæгъынц Æхсæнадон Советы уæнгтæ, – æмæ æхсæвыгон сывæллæттæн уынджы у тæссаг. Арæх бахауынц фыдбылызты, кæнын райдайынц анæуаг митæ, сæхи сбæттынц æъъгъдаухалджытимæ. Уый та расайы æвзæр фæстиуджытæм.

Рейды архайджыты хъуыдымæ гæсгæ, сывæллæттæм уæлдай фылдæр æргом здахын хъæуы сæрдыгон каникулты рæстæг. Уæд сын уæгъд рæстæг бирæ вæййы, ныййарджытæ та фылдæр хатт куысты вæййынц,æмæ кæстæртæ иунæгæй баззайынц.

Рейды рæстæг баурæдтой 2 æнахъом сывæллоны æмæ сæ бахæццæ кодтой Ирыстойнаг зылды хайадмæ. Сарæзтой сыл протоколтæ, æмæ сæ ныййарджыты дзуапп дæттын бахъæудзæн, сæ цот æхсæвыгон иунæгæй уынджы цæмæн уыдысты, уый тыххæй.