Сæ гæххæттытæ йæм балæвæрдта дыууæсæдæ фæндзай лæппуйæ фылдæр. Училищæйы разамынд куыд зæгъы, афтæмæй сæм уый бæрц абитуриенттæ рагæй нал уыд.
Гаглойты Арсен, абитуриент: «Иу хатт нæ горæты федтон, ацы училищæйы ахуыргæнинаджы. Фæлладуадзæн бонты фæстæ йæ хъуыдис ацæуын. Æз дæр ахъуыды кодтон, уырдæм бацæуин ахуыр кæнынмæ зæгъгæ. Мæх и цæттæ кодтон. Математикæйæ репетитормæ цыдтæн, уырыссаг æвзаг ахуыр кодтон. Ме `мбалимæ турниктыл архайдтам».
Ацы аз суворовон æфсæддон училищæмæ ахуыр кæнынмæ сæ гæххæттытæ балæврдтой 250 адæймагæй фылдæр. Уыдонæй æвзæрст æрцæудзæн 54 адæймаджы. Дыууынæй ахуыр кæндзысты 6-æм къласы, 34-æй та – æвдæмы.
Ацы азæй фæстæмæ та Суворовы номыл училищæ ногæй ис Уæрæсейы хъахъхъæнынады министрады бæрны. Райста федералон статус. Уымæ гæсгæ ардæм ахуыр кæнынмæ бацæуын кæй фæнды, уыдоны нымæц фæфылдæр. Иу бынатмæ цæуы 5 адæймаджы.
Суворовон училищæйы фидæны курсантты хъæуы 2 хуызы фæлварæнтæ радтын. Фыццаг, лæппутæн бæрæг кæндзысты се `нæниздзинад, спортивон цæттæдзинад æмæ психологон уавæр. Уый фæстæ та сæ зонындзинæдтæ математикæйæ, уырыссаг æмæ фæсарæйнаг æвзæгтæй.
Цырыхаты Владислав, абитуриент: «Æз рагæй ахуыр кодтон англисаг. Репетитортæм цыдтæн, математикæ ахуыр кодтон, уырыссаг æвзагæй правилæтæ кастæн».
Фæлæ Цæгат Кавказы суворовон æфсæддон училищæйы хицау Тауытты Руслан куыд зæгъы, уымæ гæсгæ афтæ бæрнонæй сæхи се `ппæт абитуриенттæ нæ фæцæттæ кæнынц.
Тауытты Руслан, Цæгат Кавказы суворовон æфсæддон училищæйы хицау: «Сæхи æвзæр цы абитуриенттæ бацæттæ кодтой, уыдоны ныййарджытимæ куы ныхас кодтон, уæд загътой, зæгъгæ, сæ сывæллæттæ хорз куы ахуыр кодтаиккой, уæд сæ суворовон училищæмæ не `рбакодтаиккой. Уыцы ныййарджытæн мæ фæнды зæгъын. Хъахъхъæнынады министр домы, цæмæй ацы ахуыргæнæндæттæ уой раззагдæрты хсæн. Уый та нысан кæны ам хъуамæ кæй ахуыр кæной, ахуыр кæнын кæй фæнды, стæй йæ бон кæмæн у, уыдон».
Фæлварæнтæ фæуыдзысты 15 июлы. Уый фæстæ конкурсон номхыгъдтæ æрвыст æрцæудзысты хъахъхъæнынады министрадмæ. Уым снысан кæндзысты, ам ахуыр кæныны аккаг чи у, уыдоны.
Хъайтмазты Дзерассæ
