филиал вгтрк государственная телерадиовещательная компания “Алания”

Цæгатирыстойнаг иугонд командæ ленк кæнынæй сси чемпион Æппæтуæрæсеон фæсивæдон Спартакиадæйы радон къæпхæны. Аст спортсмены рамбылдтой 11 сызгъæрин майданы. Уый канд хорз æнтыстдзинад нæу, фæлæ ма фидæнмæ къахдзæф дæр. Ныртæккæ лæппутæ æмæ чызджытæ сæхи цæттæ кæнынц финалон ерыстæм. 

Цæгат Ирыстоны командæйы сæйраг тренер ленк кæнынæй Игорь Бутякинæн бантыст уæлахиздзауты æмæ призерты командæ сæмбырд кæнын. Аст спортсменæй алчидæр тырны уæлахизмæ. Æмæ Æппæтуæрæсеон фæсивæдон спартакиадæйы цæгаткавказаг къæпхæны рамбылдтой сызгъæрин майдантæ. Сæ тренер куыд зæгъы, афтæмæй майдантæ æмбулын зындæр сси. Уымæн æмæ ленк кæныны спорты хуыз парахат кæны нæ бæстæйы æппæт регионты дæр. Фæлæ уæддæр ацы ерысты нæ фæсивæд уыдысты хуыздæртыл нымад. Кæд сын тыхджын ныхмæлæуджытæ уыди, уæддæр бацархайдтой æппæт хъарутæй, цæмæй Цæгат Ирыстоны кад фæбæрзонддæр кæной, уый тыххæй. Æмæ сын бантыст. 

Ирыстойнаг ленкгæнджыты хыгъды ныр ис 11 сызгъæрин майданы. Ерыс кодтой алы дистанциты. Уымæй уæлдай ма сæ къухы бафтыд 4 æвзисты æмæ 2 бронзæ майданы райсын дæр. 

Ксения Васькова: «Ацы спартакиадæмæ зæрдиагæй цæттæ кодтам нæхи февралæй фæстæмæ. Ленк кæнынæй уæлдай тренировкæтæ кодтам тренажертыл дæр. Нæ зæрдæ дардтам уæлахизыл. Æмæ нæ къухы бафтыд. Тынг цин кæнæм ууыл». 

Кæд не спортсментæ ныр фæуæлахиз сты, уæддæр сын фæлладуадзынæн рæстæг нæй. Сæхиуыл кусгæйæ цæттæ кæнынц ерысты радон къæпхæнмæ. 

Сызгъæрин Кубок не спортсментæн фадат дæтты августы Хъазаны Æппæтуæрæсеон Спартакиадæйы финалы архайынæн. Нæ командæ йæм йæхи цæттæ кæнын райдыдта рагацау. Алы бон дæр сын вæййы тренировкæтæ.