Цæгатирыстойнаг сиддон Мæргъиты Сослан йæ фсæддон хæс æххæст кодта Липецкы. Фæлæ ныр, йе нæниздзинадмæ гæсгæ йæ уавæр куыд уыдзæн, уый бæрæг нæу.
Лæппуйы тынг уазæлтты æртæ боны фæлæууын кодтой æфсады радхæссæг посты. Уый тыххæй хъусын кæны газет «Комсомольская правда». Статьяйы фыст куыд ис, уымæ гæсгæ йын ахæм æфхæрд æрхъуыды кодтой, хивæндæй æфсæддон хайæ рæстæгмæ кæй рацыд, уый тыххæй.
Сосланы мад куыд зæгъы, афтæмæй лæппуйæн ныссалдысты йæ къухтæ æмæ сæ йæ бон змæлын кæнын нæу, хъыгдард баййæфта йæ астæуыстæг дæр. Ныртæккæ ис Мæскуыйы госпитæлы. Тæссаг у, цæрæнбонты инвалидæй куы баззайа, уымæй. Ацы цауы тыххæй нын радзырдта Цæгат Ирыстоны салдæтты ныййарджыты комитеты сæрдар Гогаты Лорæ дæр. Куыд загъта, афтæмæй курдиаттæ арвыстой Уæрæсейы Федерацийы президент Владимир Путинмæ æмæ Ростовы æфсæддон хаймæ, цæмæй хъуыддаг равзарой, æмæ алчидæр закъоны цур дзуапп радта, уый тыххæй. Фæлæ уымæй Сосланы мад Анжеликæйæн æнцондæр нæу. Йæ хъуыдытæ æдзух баст сты йæ хъæбулы æнæниздзинадимæ.
