Сæ хæдзæрттæм бацæуын сын æнцон нæ вæййы, уæлдайдæр къæвда бон. Адæм сæ курдиæттæ хастой алыхуызон куыстуæттæм, фæлæ сын ничи баххуыс кодта.
Махъоты Владимир: «Машинæ кæмæ ис уыдонæн æнцондæр у, фæлæ фистæгæй цæуджытæ та фыдæбæттæ кæнынц. Къавда боны фæндæгтыл рацæуæн нæ вæййы. Адæм хуылыдзæй сæ хæдзæрттæм бахæццæ фæййынц».
Ныртæккæ цæхæрадæтты æмбалад «Ирыстонмæ» ссæуæн ис æрмæстдæр Гæдиаты Секъайы уынгыл æмæ Къостайы проспекты уылты. Фæлæ ацы фæндæгтæ дæр нывыл не сты. Цæрджытæн сæ бон таксимæ бадзурæн дæр нæ вæййы, шофыртæ нæ фæразы кæнынц.
Метрæй-метрмæ дзы ис дзыхъхъытæ æмæ алчидæр йæ машинæ хъахъхъæны. «Хатгай, фистæгæй ацæуын æнцондæр вæййы», – зæгъынц адæм.
Гаглойты Гурген: «Мæхæдæг æхца æрæмбырд кæнын æмæ дзы уæд иу хъыддаг саразæм, уæд иннæ».
Горæты администрацийы куыд зæгъынц, афтæмæй цæхæрадæтты æмбалады æмбæлгæ уавæртæ скæнын хауы цæрджытæм сæхимæ. Фæлæ сын сæ фæндагмæ базилынæй Дзæуджыхъæуы Мэри баххуыс кæндзæн. Æрмæст сæ бацæттæ кæнын хъæуы æмбæлгæ гæххæттытæ. Уавæр фæхуыздæр кæнынæй сын зæрдæ æвæрынц иннæ азмæ, уымæн æмæ ацы азы бюджетмæ æнæкоммерцион иугондтæн æххуыс кæныны статья хаст не рцыд.
Амы цæрджыты риссагдæр фарстатæй ма иу у, бæлццæттæласæн транспорт сæм кæй нæ цæуы, уый. Æрмæст дзы стæм хатт ссæуы 19-æм маршрут. Уый дæр цæрджыты бирæ курдиæттæм гæсгæ.
Гаглойты Гурген: «Кæд дын фæндагыл цæугæйæ исчи баурома, уæд хорз, æндæр фистагай цу».
Горæты транспорты управленийы куыд зæгъынц, афтæмæй æмбалады территоримæ маршрутон такситы шофыртæ куы ссæуынц, уæд фехалынц администрациимæ æмæ сын паддзахадон автоинспекциимæ цы уагæвæрд ис, уый. Бæлвырддæр та афтæ. Шофыртæ уавæр уынгæйæ бæлцæтты сласынц уæлдæр. Фæндаг та домæнтæн дзуапп нæ дæтты, уымæ гæсгæ дзы исты фыдбылыз куы æрцæуа, уæд дзуапп фыццаджыдæр дæтдзæн шофыр йæхæдæг.
Адæмæн удæнцойдзинад кæд скæндзысты, æмæ сæ рагон бæллиц кæд сæххæст уыдзæн, уый бæрæг нæма у, фæлæ уал нырма хæстæгдæр транспортмæ цæудзысты фистæгæй километрæй фылдæр.
