Ацы информаци Сергей Меняйло фехъусын кодта, Уæрæсейы президенты æххæстбарджын минæвар Цæгат Кавказы федералон зылды Юрий Чайка цы æмбырд сарæзта, уым
Цæгат Ирыстон бæстæйы æппæт субъектты хсæн 2024-æм азы информацион активондзинады къабазы 72-æм бынатæй схызти 32-мæ. Национ проекттæ царды æххæст кæныны æмвæзад дæр сырæзт. Ацы информаци республикæйы сæргълæууæг Сергей Меняйло фехъусын кодта, Уæрæсейы президенты æххæстбарджын минæвар Цæгат Кавказы федералон зылды Юрий Чайка цы æмбырд сарæзта, уым. Æмбырд ацыд онлайн хуызы. Ныхас дзы цыди национ проекттæ æххæст кæныныл æмæ 2030-æм азмæ национ проектты фæлгæты регионалон программæтæ цæттæ кæныныл. Юрий Чайка бузныг загъта регионты разамонджытæн ацы къабазы ахадгæ куысты тыххæй. Бæстонæй æрдзырдта лыггæнинаг фарстатыл дæр. Сергей Меняйло куыд загъта, афтæмæй Цæгат Ирыстоны æнтыстджынæй æххæстгонд цæуы, 13 национ проекты хыгъды чи ис, ахæм 46 регионалон проекты. Национ проекттыл кусыны хъуыддаджы дæр нæ республикæ 82-æм бынатæй схызти 24-мæ. Дзуапдæттæг оргæнтæ ахадгæ æмгуыстад кæнынц федералон профилон ведомствæтимæ дæр.
