Уымæн радих кодтой 55 милуан сомы
Цæгат Ирыстон райсдзæн уæлæмхасæн фæрæзтæ онкологон рынчынтæн хостæ балхæнынæн. Уымæн радих кодтой 55 милуан сомы. Уый тыххæй аппаратон æмбырды фехъусын кодта æнæниздзинадхъахъхъæнынады министр Тебиаты Сослан. Ныхас ма цыд короновирусы уавæры тыххæй. Фæлхасадмæ цæстдарды республикон управленийы информацимæ гæсгæ, у рæстæмбис. Ног рынчынтæ рабæрæг вæййы хæрзчысыл, къаддæр кæны ковид-стационартæм курдиæтты нымæц дæр.
Дзырдтой Буроны доны системæйы куыст сног кæныны тыххæй дæр. 9-æм июны зæйы аххосæй суадон «Лабагом»-ы каптаж ныппырх. Алагиры районы сæргълæууæг фехъусын кодта, кæй бантыст бынатмæ бацæуæн ссыгъдæг кæнын. Специалисттæ райдыдтой ног донæмбырдгæнæн аразыны æмæ хæтæлтæ цалцæг кæныны куыстытæ æххæст кæнын. Хорз боны ахаст куы уа, уæд къуырийы æмгъуыдмæ фæуыдзысты.
Ныхас цыд, горæты маршруттыл цæуыны тариф 20 сомы онг фæкъаддæр кæныныл дæр. 1-æм июны 3 транспортон компанийы разамынд фæндаггаджы аргъ систа 25 соммæ. Ныр зæрдæ æвæрынц, кæй йæ фæкъаддæр кæндзысты, уымæй. Уый тыххæй загъта транспорты æмæ фæндаггон инфраструктурæйы комитеты сæрдар Солиты Тариэль. Уыимæ компанитæ хъуамæ республикæйы сæргълæууæгæн бацæттæ кæной тарифы документалон бындурæвæрд.
