Адих æй кодтой вакцинаци кæм цæуы, уыцы пункттыл
Цæгат Ирыстон райста вакцинæйы стыр парти – 6 мины 3 сæдæ дозæйы. Адих æй кодтой вакцинаци кæм цæуы, уыцы пункттыл. Иммунизаци раздæрау ацæуæн ис горæты 1-æм поликлиникæйы. Медицинон куыстуат райста 1000 комплекты. Уый тыххæй журналисттæн фехъусын кодта поликлиникæйы терапевт Хъесаты Иридæ. Вакцинацийы пунктмæ æрвылбон цæуынц прививкæ скæнын кæй фæнды, ахæм 30-æй 50 адæймаджы онг. Вакцинаци чи скæны, уыдонмæ цæуы дохтырты цæстдард. Иммунопрофилактикæйы кабинет кусы алы бон дæр, хуыцаубонæй фæстæмæ. Прививкæ скæнынмæ хи регистраци скæнæн ис паддзахадон лæггæдты порталы уылты дæр. Хъесаты Иридæ куыд фæнысан кодта, афтæмæй республикæйы ковидæй рынчынты нымæцы æмвæзад кæны къаддæр. Фæлæ уæддæр нырма амбулаторон уагыл сæхи дзæбæх кæнынц бирæ адæм. Æппæт хъæугæ хостæй сты ифтонг.