Ацы фæзы равдисдзысты сæрмагонд проекттæ, фыст æрцæудзысты æмгуыстады бадзырдтæ æмæ цæудзæн бæстон ныхас
Цæгат Ирыстон Санкт-Петербурджы æппæтадæмон экономикон форумы равæрдта йæхи стенд. Ацы фæзы равдисдзысты сæрмагонд проекттæ, фыст æрцæудзысты æмгуыстады бадзырдтæ æмæ цæудзæн бæстон ныхас. Ныридæгæн ис фыццаг хатдзæгтæ. Республикæйы Сæргълæууæг Сергей Меняйло æмæ Уæрæсейы кластерты æмæ технопаркты Ассоциацийы директор Андрей Шпиленко бафыстой æмгуыстады бадзырд. Документмæ гæсгæ цæудзæн алывæрсыг куыст. Рæздзæн регионы промышленнон инфраструктурæ æмæ хъомыс.
Сергей Меняйло ма фембæлд Кæсæг-Балхъары республикæйы сæргълæууæг Казбек Коковимæ. Æрныхас кодтой дыууæ регионы æмгуыстадыл. Эксперттæ та æрдзырдтой Дзæуджыхъæуы аэропорты ног терминалы арæзтадæн фæрæзтæ радих кæныны асхджиагдзинадыл. Раздæр уый фæдыл документ бафыстой корпораци Кавказы директор Хасан Тимижев æмæ аэропорты генералон директор Сергей Чалов. Уый тыххæй фехъусын кодта республикæйы Сæргълæууæджы æмæ Хицауады пресс-службæ.
