Фæрæзтæ дихгонд æрцыдысты, Владимир Путины амындмæ гæсгæ цы паддзахадон программæ «Ахуырады райрæзт» сарæзтой, уый фæрцы
Цæгат Ирыстон скъолаты бындурон цалцæгæн федералон бюджетæй райста 3 миллиарды æмæ æрдæг. Фæрæзтæ дихгонд æрцыдысты, Владимир Путины амындмæ гæсгæ цы паддзахадон программæ «Ахуырады райрæзт» сарæзтой, уый фæрцы. Республикæйы бындурон цалцæг кæнинаг чи у, уыцы скъолатæ барæвдз кæндзысты 2026 азмæ. Уыимæ ма Ирыстоны арæзт æрцæудзæн æртæ ног скъолайы. Уыдонæй дыууæ – Дзæуджыхъæуы, иу та – Беслæны. Не сфæлдыстадон къорд федта цалдæр цалцæггæнинаг скъолайы. Бакæсæм Сосранты Жаннæйы сюжетмæ.
16-æм гимназы бæстыхай арæзт æрцыд 1959 азы 520 бынатæн. Ныртæккæ та дзы ахуыр кæны 600 скъоладзауы. Рагæй у бындуронæй цалцæггæнинаг. Спортивон зал Хрущевы рæстæгæй у скъолайы разамынды сæйраг тыхст, фæлæ уый иунæг фарстайаг хъуыддаг нæу.
Советон Цæдисы хъæбытыр Георгий Ларионовы номыл Дзæуджыхæуы 14-æм скъолайы бæстыхай та арæзт æрцыд 1963 азы. Капиталон цалцæг ам дæр никуы уыд. Базæронд сты доны æмæ электрон хызтæ, хъармгæнæн системæ. Зымæджы ахуыргæнджыты фæхъæуы бакæнын сæрмагонд хъармгæнæн фæрæзтæ.
Уæзхъус æмæ куырмыты сывæллæтты кълас ам байгом 2014 –æм азы, ныр уыдзæн сæ дыккаг рауагъд. Ахæм сывæллæттимæ архайынæн хъæуы хицæн уавæртæ. Кæд скъолайы директор æмæ ахуыргæнджытæ зæрдиагæй архайынц, уæддæр сын не нтысы æххæстæй сæ саразын. Иу кабинеты сæ ахуыргæнæн бынат, фæлладуадзæн æмæ тренировкæтæ кæнæн фæзтæ.
Зæрдæдарæн ис ууыл, æмæ Цæгат Ирыстон скъолаты капиталон цалцæгæн федералон бюджетæй райста 3.5 миллиарды . Фæрæзтæ дихгонд æрцыдысты, Владимир Путины амындмæ гæсгæ цы паддзахадон программæ «Ахуырады райрæзт» сарæзтой, уый фæрцы. Куыст ыл хъуамæ æрцæуа 2022-2026 азмæ.
Уыимæ ма Ирыстоны арæзт æрцæудзæн æртæ ног скъолайы. Уыдонæй дыууæ – Дзæуджыхъæуы иу та – Беслæны.
