Дзæуджыхъæуы ныридæгæн ис 6 станцæйы, фидæны та ма сæ баххæст кæндзысты 9-æй
Цæгат Ирыстон сси, электромобильтæ ифтындзæн станцæтæ ахадгæ кæм сты, уыцы регионтæй иу. Ахæм бадзырд бафыста Уæрæсейы Хицауады сæрдар Михаил Мишустин. 2030-æм азмæ, нысанмæ гæсгæ, бæстæйы ахæм станцæтæ сараздзысты 72 мины онг. Уый та пайда канд адæмæн нæу, фæлæ ма æрдзæн дæр. Дзæуджыхъæуы ныридæгæн ис 6 станцæйы, фидæны та ма сæ баххæст кæндзысты 9-æй. Цæмæй пайда сты ахæм машинæтæ, уый тыххæй радзурдзæн Тъехты Элинæ.
Цалдæр мæйы размæ Плиты Хъазыбеджы бафæндыд электромобиль балхæнын. Уымæн æмæ йе мбалмæ ахæм транспорты хуыз ис 4 азæй фылдæр. Кæй зæгъын æй хъæуы, фæцыд Хъазыбеджы зæрдæмæ дæр. Ахæм машинæйæ пайда кæнын хуыздæр у – зæгъы нæлгоймаг. Фæлæ йын ис иу аипп – бирæйы фаг нæ кæны. Ома, йæ аккумулятор фаг кæны æрмæстдæр 150 километрæн. Уыцы фарста дæр лыггонд æрцыд, Дзæуджыхъæуы сæрмагонд станцæтæ куы сарæзтой, уæд.
Сæрмагонд станцæйы ис 3 бынаты. Арæзт сты машинæты алы хуызтæн. Машинæтæ сифтындзынмæ бахъуы сахаты бæрц. Автомобилон артаджы станцæйы директор Цæлойты Тимур куыд зæгъы, афтæмæй ныридæгæн ацы бынат у ахадгæ. Фæстаг рæстæг экологон транспорты нымæц нæ республикæйы бирæ фæфылдæр.
Ныридæгæн Дзæуджыхъæуы кусынц 6 станцæйы. Уæдæ сæ баиу кæнæн ис Коцойты Арсены, Барбашовы уынгты, стæй Къостайы проспекты æмæ Московскийы сосавæндаджы цы электрон ифтындзæнтæ ис, уыдонмæ дæр.
Фарон Цæгат Ирыстон архайдта, ифтындзæн инфраструктурæ аразыны проекты. Паддзахадон æххуысы руаджы амалхъом адæмæн баххæст кодтой сæ хæрдзты 60 проценты.
Æдæппæтæй федералон проекты архайджытæ систы Уæрæсейы 67 регионы. 2030-æм азмæ та, нысантæм гæсгæ, Уæрæсейаг электромобильтæ транспорты куыстады 10 процентæй къаддæр нæ уыдзæн.
