Уыдонæн стыр æххуыс сты, республикæйы районты хъæуты цы «Точка Роста»-йы кабинеттæ байгом кодтой, уыдон
Цæгат Ирыстон стыр къахдзæф акодта, IT-технологитæ кæй хонынц, уыдонæй пайда кæныны хъуыддаджы. Уыдонæн стыр æххуыс сты, республикæйы районты хъæуты цы «Точка Роста»-йы кабинеттæ байгом кодтой, уыдон. Æххæст сты нырыккон техникæйæ æмæ гæнæнтæй. Сывæллæттæн дзы архайыны фадат ис, райдай 3Д ручкæтæй æмæ квадрокоптертæй фæуы. Сæ уавæртæ сын федта Сосранты Жаннæ æмæ йын ныхасы бар.
Цыколайы фыццæгæм скъолайы ахуырдзаутæ цин кæнынц сæхи къухтæй цы роботтæ æрæмбырд кодтой, уыдоныл. Хъæуккаг скъоладзауæн ахæм уавæртæ искуы фæзындзæн, уый æрæджы дæр ма бирæтæй нæ уырныдта, ныр сабитæн ис фылдæр гæнæнтæ сæ зондахаст фылдæр кæнынæн.
Куыд дарддæр, афтæ фылдæр. Сывæллæттæ цин кæнынц сæ ног зонындзинæдтæ æмæ арæхстдзинæдтыл.
Уæдæ уæлдай ныхасы аккаг та у, цы пресс-центр дзы кусы, уый. Цы бирæ гæнæнтæ сæм ис, уыдоны фæрцы та зонгæ кæнынц журналистты куысты сусæгдзинæдтимæ.
Куыд алы хъуыддаджы, афтæ ам дæр йæ райдиан куыд зын уыд, йæ дарддæры архайд та уыйбæрц æхцондзинад хæссы куыд ахуырдзаутæн, афтæ ахуыргæнджытæн дæр.
«Точка Роста»-йы кабинетты ма сæ уроктæ фæцымыдиссагдæр кæнæн ис иннæ предметты ахуыргæнджытæн дæр, æмæ дзы ам пайда кæнынц.
Уæвгæ Цыколайы фыццæгæм скъолайы «Точка Роста»-йы æнтыстдзиндтæн стыр аргъ скодтой цæугæ Кванториумы архайджытæ. Куыд зæгъынц, афтæмæй республикæйы цы скъолаты уыдысты, уыдонимæ абаргæйæ ам сывæллæттимæ куыд куыст цæуы, уый у бафæзминаг.
Зæгъын ма хъæуы уый дæр, æмæ скъолайы сæргълæууæг Цæрикъаты Таймураз «Точка Роста»-йы къордты куыстмæ куыдфæндыйы цæстæй кæй нæ кæсы. Архайы йæ ахуыргæнджыты дæсныйад бæрзонддæр кæнынæн гæнæнтæ æмæ мадзæлттæ арыныл.
Республикæйы районты хъæуты «Точка Роста»-йы кабинеттæ кæй фæзынд, уый стыр къахдзæф у фидæны кæстæрты зондахаст фылдæр кæнынмæ. Уымæн æвдисæнтæ, ныр дæр фенæн ис, фæлæ куыд фæзæгъынц – куыд дарддæр афтæ та фылдæр.
