Абон республикæйы архайы 60 профилон куыстуатæй фылдæр
Цæгат Ирыстон Цæгат Кавказы федералон зылды ахсы фыццаг бынат кæсаджы продукци цæттæ кæнынæй. Хъæууон хæдзарады ацы къабаз æнтыстджындæртæй иу у, бынæттон климат уымæн хорз кæй бæззы, бирæ æрдзон донуаттæ кæй ис, æмæ кæсаг афæдзы дæргъы хъомыл кæнын кæй ис, уымæ гæсгæ. Абон республикæйы архайы 60 профилон куыстуатæй фылдæр. Цæгат Ирыстоны ацы къабаз куыд рæзы, уый тыххæй радзурдзæн Хъайтмазты Дзерассæ.
Кæсаджы æмæ хъæууонхæдзарадон цæрæгойтæн холлæгтæ цæттæгæнæн завод æнтыстджынæй кусы Беслæны. Йæ хъомыс – сахатмæ 10 тоннæйы холлаг. Суткæмæ уайы 200 тоннæйы бæрц. Беслæны завод Цæгат Кавказы федералон зылды у иунæг ахæм стыр куыстуат.
Кусæн процесс автоматизацигонд у æмæ иу минут дæр не рлæууы. Завод кусы 3 радæй. Холлаг æрвитынц Уæрæсейы алы регионтæм æмæ ма суанг фæсарæнтæм дæр.
2021-æм азы Кæрдзыны райдыдтой балер кæсаджы куыст кæнын. Ам ис лæппын кæсæгты комплекс дæр, æмæ кæсаджы куыстгæнæн хи цех дæр. Кæрдзыны хæдзарад у стыр куыстуаты цалдæр хайæ иу. Компани архайы 2017-æм азæй. Республикæйы нымад у æппæтæй стырдæрыл. Хауы ма æнтыстджындæр инвестицион проекттæм.
Уыцы иу рæстæг бассейнты дарæн ис кæсæгтæ 400 тоннæйы бæрц. Фидæны сæ фæнд кæнынц 600 тоннæйы онг фæфылдæр кæнын. Цæттæ продукци æрвитынц дуканитæм æмæ оптæй æлхæнджытæм. Бæрзондтехнологон хæдзарадæн автоматизацийы къабазы ныридæгæн ис æнтыстджын бæрæггæнæнтæ.
Ирыстон Цæгат Кавказы федералон зылды ахсы фыццаг бынат кæсаджы продукци цæттæ кæнынæй. Ис раззæгты æмрæнхъ бæстæйы дæр. Абон республикæйы кусы 60 профилон куыстуатæй фылдæр.
