Конкурсы архайдта 20 тыхджын ансамблæй фылдæр
Цæгат Ирыстонæй 2 хореографион къорды «Ир» æмæ «Иры стъалытæ» бацахстой призон бынæттæ Уæрæсейы чемпионаты Кавказы адæмты кæфтытæй. Уыд Стъараполы. Конкурсы архайдта 20 тыхджын ансамблæй фылдæр. Сæ курдиатæн та сын аргъ кодтой зындгонд хорегографтæ.
Ахæм рог кафт у бирæ мæйты цæттæдзинады хатдзæг. Сценæйы алы лыстæг хъуыддаг дæр ахсджиаг у – къухы айст, мидбылхудт, цæстæнгас. Уый у Уæлахизы формулæ, зæгъынц аивадон къорд «Иры стъалыты» солисттæ. Сæхи æнтыстджынæй равдыстой Уæрæсейы чемпионаты Кавказы адæмты кæфтытæй. Уыд Стъараполы. Æвзонг артисттæ бацахстой 2-аг бынат.
Конкурсы георграфи уæрæх уыд. Сæ арæхстдзинад равдисынмæ Стъараполы æрæмбырд сты æрмæст цæгаткавказаг республикæты аивадон къордтæ нæ, фæлæ ма бæстæйы иннæ регионты минæвæрттæ. Чемпионаты архайдта 20 ансамблæй фылдæр. Жюрийы хыгъды – зындгонд хореографтæ.
Адæмон ансамбль «Ир» та Уæрæсейы чемпионаты фыццаг хатт нæ рамбылдта. Алы аз дæр артисттæ тырнынц сæ кафты хуыздæр традицитæ равдисыныл. Къорды разамонæг Джиоты Хасан куыд зæгъы, афтæмæй национ кафæн ерысы уæлахиз – ансамблæн ахсджиаг цау у.
Кафт æвдисы адæмы миддуне, æмæ артистты нысан у, йæ мидис аивадуарзджытæм фæхæццæ кæнын. Ансамблы куыд зæгъынц, афтæмæй аивадон равдыстыты бындуры æнæхъæн дуне сусæггонд ис. «Ир»-ы кафы 50 адæймаджы, æмæ сæ алчидæр йæхи бынаты ис.
Ацы æвзонг артистты алы уæлахиз дæр разæнгард кæны ног бæрзæндтæм хизынмæ. Разæй аивадон къордтæм æнхъæлмæ кæсынц сæрмагонд концерттæ, æппæтуæрæсеон фестивальтæ. Æмæ сæ сæйраг нысан у – дарддæр аивадуарзджыты зæрдæты национ культурæмæ уарзондзинад гуырын кæнын.
