Ныртæккæ йæ тæмæны ис æфсадмæ сидыны уалдзыгон кампани
Æфсады рæнхъыты æрлæууынмæ бæззы æви нæ? Ацы фарстайæн дзуапп райсæн ис цалдæр къæпхæны ацæугæйæ. Фыццаг медицинон, уый фæстæ та – сæрмагонд къамисы æркаст. Æрмæстдæр уый фæстæ ацæуынц сиддонтæ райгуырæн бæстæйы раз се фæсддон хæс æххæст кæнынмæ. Цæгат Ирыстонæй æфсады рæнхъытæ фæфылдæр кæндзысты 900 лæппуйы. Ныртæккæ йæ тæмæны ис æфсадмæ сидыны уалдзыгон кампани. Бæлвырддæр Гуытъиаты Алинæйы æрмæджы.
Дзæрæгæсты Марат сиддоны гæххæттмæ зæрдиагæй æнхъæлмæ каст. Райгуырæн бæстæ хъахъхъæнын нымайы йæ сæйраг хæсыл. Службæйы размæ лæппуйæн йæ ныстуан загъта йæ фыд. Марат куыд зæгъы, афтæмæй йæ фыды фæрцы æфсæддон службæ йæ цæсты скадджын.
Къамисы раз æрлæууыны агъоммæ лæппуйы хъæуы ацæуын дохтырты æркаст терапевт, цæстыты дохтыр, хирург æмæ иннæ специалисттæ хъуамæ рахæссой хатдзæг сиддоны æнæниздзинады уавæры тыххæй. Антрополог Колыты Маргаритæ куыд зæгъы, афтæмæй фæсивæды æнæниздзинады уавæрмæ фау æрхæссæн нæй.
Пандемияйы уавæртæ нымайгæйæ фæстаг рæстæг сиддонты бæрæг кæнынц, коронавирусы инфекци сæм ис æви нæй, уымæй. Кæд эпидемиологон уавæр зынгæ фæхуыздæр, уæддæр уыцы мадзæлттæ ивд не рцæудзысты — зæрдæ бавæрдтой Республикæйы æфсæддон комиссарады.
Райгуырæн бæстæ фидæны хъахъхъæнджыты ма хъæудзæнис ацæуын ноджыдæр иу къамис сæ арвитыны размæ. Уый та уымæн хъæуы, цæмæй фидæны æфсæддоны æнæниздзинад дызæрдыггаг ма уа. Сиддонты фыццаг къордтæ арвитдзысты апрелы астæу. Æдæппæтæй уалдзыгон æрсидты рæстæг нæ республикжйæ Уæрæсейы гæрзифтонг тыхтæм араст уыдзысты фарастсæдæ лæппуйы.
