Дохтыртæ ссыдысты Санкт Петербургæй
Цæгат Ирыстонмæ куыста медицинон десант. Дохтыртæ ссыдысты Санкт Петербургæй. Специалисттæ уыдысты хъусты, фындзы æмæ хъуырты низты наукон-иртасæг институтæй, стæй сывæллæтты сурдологон центрæй. Дыууæ боны, сурдологийы центр «Доктор Слух»-ы бындурыл æххуыс кодтой рынчынтæн. Æвзæр чи хъусы, æмæ кохлеарон имплантацийы операци конд кæмæн уыди, уыдонæн фадат уыди, се нæниздзинад фенын кæнынæн. Кохлеарон имплантацийы процедурæйы фæрцы, æвзæр чи хъусы, уыдонæн сæ уавæр схорз вæййы, æмæ райдайынц хъусын. Фæлæ, уыцы рынчынты алы аз дæр хъæуы æндæр регионтæм цæуын, реабилитаци скæнынæн. Уым сын сæ процессормæ базилынц, стæй сурдапедагогимæ скæнынц ахуыртæ. Æппæт ацы мадзæлттæ пациенттæн, кæй зæгъын æй хъæуы, сты пайда, фæлæ, уый хыгъд та сты уæлæмхасæн хæрдзтимæ баст, æмæ уый тыххæй се ппæты бон нæ вæййы, ацæуын. Ныр, сурдологон центр «Доктор слух»-ы разамынды хъæппæрисæй, стæй Паддзахадон думæйы Депутат Таймазты Артуры æххуысæй рынчынтæ æппæт хъæугæ лæггæдтæ райстой нæхи республикæйы.
