Сæ фылдæр сты сывæллæттæ
Цæгат Ирыстонмæ ныртæккæ онг Донецкы æмæ Луганскы адæмон республикæтæй ссыди 308 адæймаджы. Сæ фылдæр сты сывæллæттæ. Нæ республикæйы сæм æнхъæлмæ кæсы æндæр цард. Ам арæзт цæуы алцыдæр, цæмæй сæ зæрдæтæ барухс уой, уый тыххæй. Лæппутæ æмæ чызджытæ сбæрæг кæнынц сæ гуырæнбонтæ, ссарынц ног æмбæлтты, кæрæдзийæн кæнынц ахадгæ æххуыс. Бæстондæр радзурдзæн Касаты Наирæ.
Хæрзаудæн проект «Иумæйаг бæллицтæ» аразджытæй дидинджытæ æмæ шартæ. Гæнæн ис æмæ ахæм æхсызгон цаумæ къласы ничи æнхъæлмæ касти. Анастасия Доминова Ирыстонмæ Донбассæй къуыри æмæ рдæджы размæ ссыди. Чызгыл сæххæст 15 азы.
Анастасийæ йæ ныййарджытимæ æмæ йæ кæстæр æфсымæримæ рæстæгмæ фæхицæн. Уыдоны арвыстой æндæр æдас бынатмæ – Владимирмæ. Æппæты тынгдæр чызджы фæнды йæ бинонтимæ уæвын. Куыд зæгъы, афтæмæй йын йæ ног æмкъласонтæ æххуыс кæнынц йæ тыхст уавæры. Уыдон дæр ын баццæттæ кодтой æхсызгон цау. Йæ зæрдæмæ йæ арф айста.
Сæрмæгонд хæрзаудæн акци «Лæвар кæнæм иумæ» цæуы лидзæг адæмæн рæстæгмæй цæрæн бынæттæ кæм скодтой, уыцы субъектты се ппæты дæр. Лæвæрттæ, спортивон кусæнгæрзтæ, сфæлдыстадон куыст кæнынæн æрмæджытæ, хъазæнтæ, музыкалон инструменттæ, нымæцон техникæ, культурон-ирхæфсæн центртæм билеттæ æмæ чингуытæ.
Донбассæй цы сывæллæттæ ссыди, уыдон ныр цæрынц санаторий Тæмисчъы. Æдæппæтæй 77 адæймаджы, сæ ахуыргæнджытæ æмæ сæ хъомылгæнджытимæ. Сæ цард сын ног ахорæнтæй саив кæныныл бацархайдтой педагогтæ æмæ санаторийы кусджытæ. Сывæллæттæ архайынц алыхуызон сфæлдыстадон æмæ спортивон къордты. Сывæллæттæ фыстæджытæ æрвитынц сæ райгуырæн зæхх сын чи хъахъхъæны, уыцы æфсæддонтæм.
11 аздзыд Амина Бондаренко дæр йæ бинонтæй у дард, Ирыстонмæ ссыди мæйы размæ. Чызг радзырдта, йæ ныййарджытæ йæ æдас ранмæ кæй рарвыстой, уый, фæлæ йæ зæрдæ дары, тагъд кæй сæмбæлдзысты, æмæ та раздæрау æдасæй кæй цæрдзысты, ууыл. Хæдзары баззадысты сæ хистæртæ. Æнкъард сыл кæны, æмæ сæ бæллы тагъд фенынмæ.
Донецкы адæмон республикæйы рæзгæ фæлтæрæн баххуыс кодтой «Иугонд Уæрæсейы Æрыгон Гварди»-йы минæвæрттæ дæр, парти регионалон æхсæнадон исæнуатимæ æмæ «Уæлахиз»-ы волонтертимæ иумæ. Рæстæгмæйы цæрæнуæттæм баластой гуманитарон æххуыс. Баластой сын æнæмæнг хъæугæ дзаумæттæ, канцелярон кусæнгæрзтæ, хъазæнтæ æмæ адджинæгтæ.
Уымæй уæлдай, сывæллæттæн балæвар кодтой аниматортимæ ирхæфсæн программæ. Партийы регионалон хайады зæрдæ бавæрдтой, цалынмæ сывæллæттæ нæ республикæйы уой, уæдмæ сын кæй æххуыс кæндзысты, уымæй.
