Организаци архайы лæвар психологон æмæ юридикон æххуыс кæныныл, æмбæлгæ гæххæттытæ райсыныл
Цæгат Ирыстоны 1-æм июны кусын райдыдта фонд «Фыдыбæстæ хъахъхъæнджытæ». Уæрæсейы президент Владимир Путины амындмæ гæсгæ хайæдтæ байгом кодтой нæ бæстæйы регионты. Организаци архайы лæвар психологон æмæ юридикон æххуыс кæныныл, æмбæлгæ гæххæттытæ райсыныл. Уымæй дарддæр, ахадгæ æмæ алывæрсыг æххуыс кæны æдзард æфсæддонты бинонтæн. Фонд архайы федералон бюджеты æмæ зæрдæхæлар адæмы фæрæзтæй. Мæй æмæ рдæгмæ Цæгат Ирыстоны баххуыс кодтой 100 адæймагæй фылдæрæн. Бæлвырддæр хабæрттæ радзурдзæн Тъехты Элинæ.
«Æххуысхъуаг чи у, уыдонмæ фæкæсын». Ахæм у фонд «Фыдыбæстæ хъахъхъæнджыты» девиз. Джызойты Светланæ æрæджы дæр ма нæ зыдта, цы кæна, уый. Уымæн æмæ майы райдайæн Светланæйæн йæ цардæмбал æмæ йæ чызг фæцæф сты Донецкы адæмон республикæйы Буденовскы районы. Украинæйы æфсæддонтæ фехстой, граждайнаг цæрджытæ кæм уыдысты, уыцы бынатмæ. Нæлгоймаг йæ бинойнаджы æмæ сывæллæтты хъахъхъæнгæйæ фæцæф, йæ чызг цæмæй аирвæза, уый тыххæй та йын дохтырты бахъуыд йæ къах алыг кæнын. Сæрмагонд æфсæддон операцийы архайджытæн цы регионалон фонд скодтой, уырдæм Светланæ арвыста йæ курдиат æмæ бинонтæн арвыстой гуманитарон æххуыс.
Ныридæгæн архайынц, цæмæй Светланæйы чызджы æмæ йæ сывæллæтты сласой Ирыстонмæ, ууыл. Фæлæ сæ уый размæ аласдзысты Мæскуымæ реабилитацимæ. «Фыдыбæстæ хъахъхъæнджыты» регионалон фонды ныридæгæн кусы 25 социалон координаторы. Специалисттæ адæмæн æххуыс кæнынц алы къабæзты. Юридикон, медицинон æмæ афтæ дарддæр. Ахсджиаг у алкæмæн дæр хъæугæ æххуыс бакæнын – зæгъынц социалон координатортæ.
«Фыдыбæстæ хъахъхъæнджыты» регионалон фонд йæ куыст кæнын райдыдта 1-æм июны. Уыцы рæстæгмæ баххуыс кодтой 100 адæймагæй фылдæрæн.
Социалон координатортæ кусынц республикæйы районты дæр. Фондмæ курдиат бахæссын сæ бон у æфсæддон ветерантæн æмæ сæ бинонтæн, стæй, æфсæддон цæфты фæстæ инвалид чи сси, уыдонæн дæр. Курдиат бадæттæн ис социалон хызты руаджы.
