Уыдоны ивгъуыд аз дзæбæхгæнæн процедурæтæ скодтой 7 мин адæймагæй фылдæр
Цæгат Ирыстоны 16 медицинон куыстуаты арæзт æрцыдысты фадæттæ алы хуызы реабилитаци ацæуынæн. Уыдоны ивгъуыд аз дзæбæхгæнæн процедурæтæ скодтой 7 мин адæймагæй фылдæр. Медицинон куыстуæттæ æххæст сты æппæт техникон фæрæзтæй. Дзæуджыхъæуы 7-æм поликлиникæйы реабилитацийы хайады куысты тыххæй бæлвырддæр радзурдзæн Чехойты Фатимæ.
Боллоты Рамазан у футболæй хъазæг. Уый йын æрмæст рæстæг æрвитыны уарзон хъуыддаг нæу. Тренировкæтæм кæсы бæрнон цæстæй. 3 къуырийы размæ радон турнирмæ цæттæгæнгæйæ ныццавта йæ уæраг. Операцийы бæсты йæ хъæуы реабилитаци ацæуын. Дзæбæхгæнæн процедурæтæ йын кæнынц Дзæуджыхъæуы 7-æм поликлиникæйы. Рамазан, æнæмæнг, фæнд кæны ногæй хъæзæн фæзмæ рацæуын.
Афæдзы размæ поликлиникæйы ахæм фадæттæ нæ уыд. Æрмæстдæр дзы уыд скæнæн массаж, дзæбæхгæнæн физкультурæ æмæ физиотерапийæ. Ныр медицинон реабилитацийы хайады лæггæдтæ фæуæрæхдæр сты. Фæзынд дзы техникæйы 50 нырыккон фæрæзы, уыдонимæ 6 тренажеры. Дыууæ хъæуынц къæхтæ дзæбæх кæнынæн, дыууæ та – къухтæ. Ис дзы сæрмагонд стъол – фæсонты низтæ кæмæ ис, уыдонæн, стæй ма – нейроинтерфейс дæр.
Дзæбæхгæнæн физкультурæйы кабинет æххæст у хъæугæ техникон фæрæзтæй, рынчынтæ ногæй цæуын ахуыр кæмæй пайда кæнынц, ахæмтæ. Згъорæн фæндаг – сæйрагдæр æххуысгæнджытæй иу. Буары уырдыг, пульс, калориты хардз – тренажерыл хыгъд цæуынц æппæт бæрæггæнæнтæ.
Специалисттæм гæсгæ,10 процедурæйы сты реабилитацийы стандартон хуыз. Дохтырты къамис аргъ скæны рынчыны æнæиздзинады уавæрæн, куы фæхъæуы, уæд фæфылдæр кæны процедурæты нымæц. Дохтыр-реабилитолог Кирилл Петров у уыцы къамисы уæнг. Поликлиникæйы афæдз дæр нæма кусы, фæлæ уыцы рæстæгмæ баххуыс кодта рынчын сылгоймагæн йæ къæхтыл слæууынæн, кæд ын дохтыртæ уый æнхъæл нæ уыдысты, уæддæр.
Ног техникон фæрæзтæ фæзынд физиотерапийы кабинеты дæр. Специалистты ныхæстæм гæсгæ, мæйы дæргъы хайады процедурæтæ ацæуынц 20 рынчыны онг.
Цæфты, операциты æмæ уæззау низты фæстæ реабилитаци ацæуынæн фадæттæ арæзт сты Цæгат Ирыстоны 16 медицинон куыстуаты. Уыдоны ивгъуыд аз дзæбæхгæнæн процедурæтæ скодтой 7 мин адæймагæй фылдæр.
