Куыстытæ цæудзысты республикæйы 7 районы.
Национ проект «Æнæниздзинадхъахъхъæнынад» æххæст кæнгæйæ, Цæгат Ирыстоны 2020-æм азмæ нысангод цæуы кæлæддзаг уавæры чи ис, ахæм 36 фельдшерон-акушерон пункты арæзтад æмæ реконструкци. Куыстытæ цæудзысты республикæйы 7 районы. Ногдзинæдтæ æнхъæлмæ кæсынц Мæздæджы, Алагиры, Рахизфарсы, Æрæфы, Горæтгæрон æмæ Æрыдоны районты, стæй Дзæуджыхъæуы. Уый тыххæй республикæйы Сæргълæууæг Битарты Вячеслав фехъусын кодта æнæниздзинадхъахъхъæнынады министр Годжысаты Тамерланимæ фембæлды. Профилон ведомствæйы разамонæг куыд загъта, афтæмæй министрад архайы 7 регионалон проект æххæст кæныныл. Ацы хъуыддæгтæн иумæйагæй 2019-æм азы дихгонд æрцыди 1 миллиард æмæ 260 милуан сомы. Арæзтадон æмæ цалцæггæнæн куыстытæ кæронмæ фæхæццæ кæнынц Черменыхъæуы амбулаторийы, республикæйы психиатрион рынчындоны дыууæ корпусы æмæ тагъд æххуысы клиникон рынчындоны. Годжысаты Тамерлан ма куыд фехъусын кодта, афтæмæй ныртæккæ куыст цæуы 6-æм поликлиникæ сæхгæныныл дæр. Дохтыртæ æмæ медицинон хотæ куысты ныллæууыдысты æндæр медицинон куыстуæтты. УФ-йы президенты майы указтæ æххстгæнгæйæ, ацы азы 1-æм ноябрьмæ Дзæуджыхъæуы тагъд æххуысы станцæйы кусджытæ сæ уæлæмхасæн фиддонтæ фæфылдæр сты – дохтыртæн 6 мины онг, фельдшертæн та 2 мины онг. Федералон бюджеты хардзæй ацы аз республикæ райста 13 тагъд æххуысы машинæйы.
