Координацион советы æмбырды æрныхас кодтой организацийы рæзтыл æмæ ацы азы нысантыл
Цæгат Ирыстоны 70 мин æрыгон адæймагæй фылдæр ныртæккæ сты Фыццæгты Змæлды рæнхъыты. Координацион советы æмбырды æрныхас кодтой организацийы рæзтыл æмæ ацы азы нысантыл. Æмбырд амыдта республикæйы Сæргълæууæг Сергей Меняйло. Видеоконференцийы хуызы дзы архайдта Фыццæгты Змæлды разамынды сæрдары хæдивæг Ксения Янова. Республикæйы разамонæг куыд загъта, афтæмæй ахсджиаг у сывæллæттимæ æмæ рæзгæ фæлтæримæ кусын. Змæлды программæтæ æмæ хъæппæристæ сын хъуамæ æххуыс кæной сæ хъомыс æргом кæнынæн, сфæлдыстады, спорты æмæ зонадон куысты дæр. Нæ республикæйы кусынц организацийы 230 хайады. Ныртæккæ дзы архайынц 72 180 ахуыргæнинаджы скъолатæй, колледжтæй æмæ уæлдæр ахуыргæнæндæттæй. Регионалон хайады Советы сæрдар Саулохты Сæрмæт куыд загъта, афтæмæй Фыццæгты Змæлды мадзæлттæм фæсивæд стыр æргом здахынц. Афтæмæй се вæрæн хæссынц нæ бæстæйы рæзтмæ.
