Нæлгоймаджы хуыздæр роль спектакль «Паддзах Лир»-ы тыххæй
Цæгат Ирыстоны адæмон артист Æлбегаты Алан сси преми «Сызгъæрин маскæ»-йы лауреат, нæлгоймаджы хуыздæр роль спектакль «Паддзах Лир»-ы тыххæй. Мæскуыйы, Евгений Вахтанговы номыл театры 30-æм хатт арæзт æрцыд Уæрæсейы национ театралон премийы лауреатты схорзæхджын кæныны кадджын мадзал. Паддзах Лир иронау сдзырдта ивгъуыд аз февралы. Уæдæй фæстæмæ Уалыты Гивийы постановкæ театрдзауты зæрдæмæ тынг цæуы. Тæбæхсæуты Балойы номыл Ирон академион театры спектакль хаст æрцыд 4 номинацимæ. Ацы преми æнæхъæн коллективæн дæр стыр æнтыстдзинадыл нымад у. Кадджын театралон премийы лауреаты тыххæй бæстондæр радзурдзæн Фидараты Маринæ.
Ныртæккæ дæр, сюжеты сæйраг хъайтар уæвгæйæ, æмæ æппæт фæрстытæ уымæ хаугæйæ, Æлбегаты Алан йæхи тыххæй дзурын нæ уадзы. Ирон театры историйы тыххæй чиныджы сыфтæ фæлдахгæйæ, сæрбæрзондæй дзуры, ацы кадджын хæрзиуæг кæй фæрцы райста, уыдоны тыххæй. Бафæзмæн кæй нæй, уыцы артисттæ, уарзон педагогтæ æмæ зæрдæйæн хæстæг адæм.
Паддзах Лиры роль Æлбегаты Аланæн, зæгъæн ис, æмæ балæвар кодта хъысмæт. Райдианы хъуамæ йæхиуыл сбарстаид æндæр сурæт – Лиры æнувыд æххуырст Кенты. Иу репетици иннæйы фæдыл, æмæ Кент Аланæн сси хæстæг роль. Фæлæ рауад афтæ, æмæ спектаклы цыд бахъуыд цæхгæр аивын.
Репетициты рæстæг актер йæхæдæг æмбарын райдыдта, спектакль Лиры карыл дзурæг нæу, фæлæ йæ историйы æмæ йæм æхсæнады ахастдзинады тыххæй. Иунæг зындзинад – иннæ рольмæ рахизын, æмæ æмхуызон миниуджытæ агурын.
Преми дæттыны кадджын мадзалы тыххæй дзургæйæ, Æлбегаты Алан загъта, фыццаджы йæ æмбаргæ дæр нæ бакодта, цы рцыди, уый. Ацы уæлахиз ын уыд æнæнхъæлæджы. Фæлæ уый аккаг уыди. Нæлгоймаджы хуыздæр ролы тыххæй премийы лауреат, Евгений Вахтанговы номыл легендарон театры сценæйы лæугæйæ, арфæйы ныхæстæ загъта йæ разамонджытæн æмæ ахуыргæнджытæн. Уыцы сфæлдыстадон хъæппæрис царды чи рауагъта, уыдон сты уæлдай арфæты аккаг.
Уыимæ актер рох нæ кæны, радон æнтыстдзинадыл æрлæууын раст нæу. Ног бон æмæ ног нысантæ, ногæй æмæ ногæй. Сæйрагдæр у дæхицæн дæр æмæ аивадуарзджытæн дæр æвдисын – уарзон сценæмæ рацæуын хуымæтæг хъуыддаг нæу. Æмæ дын куы нтыса, уæд хъуамæ уыцы нтысдзинад кæна æрмæстдæр фидардæр.
Фидæнмæ стыр нысантимæ æмæ фæндтимæ Æлбегаты Алан цæуы, уæндон къахдзæфтæ кæнгæйæ. Уыимæ – йæ уарзон театримæ. Уымæн æмæ йын лæггад кæны зæрдиагæй. Кадджын театралон преми «Сызгъæрин маскæ» уымæн æппæтæй ирддæр æвдисæн.
