Царды цы проекттæ уадзынц, уыдонæй иу у хъæуты ног, нырккон гæнæнтимæ фельдшерон пункттæ саразын
Фæстаг азты Цæгат Ирыстоны адæмы æнæниздзинад бахъахъхъæнынæн уавæртæ скæныныл бирæ куыст цæуы. Царды цы проекттæ уадзынц, уыдонæй иу у хъæуты ног, нырккон гæнæнтимæ фельдшерон пункттæ саразын. Йæ фæлгæты Æрæфы районы 7 хъæуы фæхайджын сты уыцы хорздзинадæй. Не сфæлдыстадон къорд федта, радон арæзтæдтыл куыд куыст цæуы уый, ныхасы бар Сосранты Жаннæйæн.
Æрæфы районы цæрджытæ рагæй æнхъæлмæ кастысты сæйраг рынчындон æмæ поликлиникæйы цалцæгмæ. Ныртæккæ куыстытæ цæуынц поликлиникæйы рацарæзтыл. Бындуронæй цалцæггонд нал уыд 1979 – æм азæй фæстæмæ. Рынчындоны сæйраг дохтыр Бесолты Тамерланы ныхæстæм гæсгæ ма дзы фæзындзæн ног кабинеттæ дæр. Фæзындзæн дзы, гериатор кæй хонынц, ахæм дохтыр. Уый йæ цæст фæдары 65 азæй уæлæмæ кæуыл цæуы, уыцы адæммæ.
Афтæмæй Æрæфы районы цæрджыты уавæртæ фæхуыздæр уыдзысты. Æнæниздзинадимæ баст фарстатæ æнцондæртæй сæ бон уыдзæн лыг кæнын. Уыимæ хæххон хъæуты цæрджытæн дæр.
Тадеты Мæирбег зæрдиагæй адæмæн лæггад кæны. Куыд хохы фельдшерон пунктты æппæт дохтыртæ, афтæ уый дæр, бахъуаджы сахат, æрбалæууы канд Дыгургомы цæрджыты уæлхъус нæ, фæлæ районмæ цы бирæ туристтæ фæцæуы, уыдоны цур дæр.
Мацутæйы фельдшерон пункты кусджытæ, кæд ныртæккæ зындæр уавæрты кусынц, уымæн æмæ сæ пункты бынат хæлд æрцыд, æмæ ныр сæ зæрдæ рухс кæны ног фельдшерон пункты арæзтад йæ тæмæны кæй у, уымæй.
