Депутаттæ хорзыл банымадтой «Административон закъонхæлдтыты тыххæй барадон æфхæрд æййафыны» республикон закъонмæ ивддзинæдтæ бахæссын
Цæгат Ирыстоны æфхæрд æййафдзысты æнæпилотон тæхæн аппаратты фæстиуджыты тыххæй хуызистытæ æмæ видеоæрмæджытæ чи парахат кæна, ахæм закъонхалджытæ. Депутаттæ хорзыл банымадтой «Административон закъонхæлдтыты тыххæй барадон æфхæрд æййафыны» республикон закъонмæ ивддзинæдтæ бахæссын. Ам ныхас цæуы террористон актты, уыимæ, æнæпилотон тæхæн аппаратты фыдбылызты фæстиуджытæ дзыллон информацион фæрæзты æмæ социалон хызты чи парахат кæна, уыдоныл. Ацы хъæппæрис бахаста республикæйы сæргълæууæг Сергей Меняйло. Уымæй уæлдай, депутаттæ сфидар кодтой ног закъон. Нырæй фæстæмæ, 1-æм июлы Цæгат Ирыстоны бæрæггонд цæудзæн æфсæддон цауты ветеранты бон.
