Ацы экскурсийыл бакуыста организаци «Ирыстоны фæскомцæдисонтæ»
Цæгат Ирыстоны æфсæддон намысы бынæттæ бабæрæг кодтой республикæйы скъоладзаутæ. Ацы экскурсийыл бакуыста организаци «Ирыстоны фæскомцæдисонтæ». Базонгæ сæ кодтой Фыдыбæстæйы Стыр хæсты мемориалон бынæттимæ. Астæуккаг кълæсты ахуырдзаутæ бабæрæг кодтой «Барбашовы фæз», Гæздæнты æфсымæрты цыртдзæвæн, Майрæмададжы музейон комплекс, Æрыдоны æмæ Æрджынарæджы æфсæддон мемориалтæ. Алы ран дæр рæзгæ фæлтæрæн лекцитæ кастытсы историктæ. Зæгъын хъæуы уый, æмæ маршрут саразын къухы бафтыди «Ирыстоны фæскомцæдисонтæ» цы паддзахадон грант рамбылдтой, уый фæрцы. Организаци ахæм экскурси скæныны фæнд кæны æппæт районты скъоладзатæн, сидзæр сывæллæтты хъомылгæнинæгтæн, стæй 58-æм æфсады æндæр регионтæй чи службæ кæны, уыдонæн. Скъоладзауты балцы тыххæй бæлвырддæр радзурдзæн Хъайтыхъты Фатимæ
Ахæм æнкъарæнтæ барæй дæр нæ равдисдзынæ. Æцæг истори дæ разы, æрмæстдæр йæм дæ къух бадар. Сабитæй бирæтæ мемориалон комплекс Барбашовы фæзы фыццаг хатт не сты. Фæлæ уæддæр алы хатт дæр сын ацы бынат ног диссæгтæ раргом кæны.
Экскурситæ сын аразынц Фыдыбæстæйы Стыр хæсты историйы специалисттæ. Алы бынаты тыххæй дæр сæ бон у дзурын æнæрлæугæйæ. Уыимæ дын радзурдзысты æмбисонды историон цауты тыххæй.
Сывæллæтты туристон маршрут цыдис республикæйы сæйрагдæр мемориалон комплексты уылты.
Барбашовы фæзæй уæлдай ма сæм хауынц Майрæмададжы музей, Гæздæнты æфсымæрты цыртдзæвæн, Æрыдоны мемориал æмæ Æрджынарæг. Историйы урочыты ахæм цымыдисаг хабæрттæ чи зоны æмæ афтæ бæлвырд нæ базондзысты. Уæлдайдæр та Цæгат Кавказыл тохы тыххæй. Ацы маршрутты фæрцы сывæллæттæ бæлвырддæр базондзысты Фыдыбæстæйы хæсты историйы хабæрттæ.
Ацы балц сын бацæттæ кодта организаци «Ирыстоны фæскомцæдис» паддзахадон гранты фæрæзты фæрцы. Программæйы сæйраг нысан у сывæллæтты патриотон хъомылад.
Тагъд рæстæг æфсæддон намысы бынæттыл туристон балцы араст уыдзысты сидзæрты хæдзæртты хъомылгæнинæгтæ æмæ фæндзай æстæм æфсады службæгæнджытæ.
