Сси транзитон уæзласæн машинæтæн техникон лæггад кæныны станцæ. Уым шофыртæ нысан кæнынц документтæ, цæуынц æркаст æмæ уадзынц сæ фæллад
Цæгат Ирыстоны æххæстæй кусын райдыдта таможняйы-логистикон комплекс «Южные ворота». Сси транзитон уæзласæн машинæтæн техникон лæггад кæныны станцæ. Уым шофыртæ нысан кæнынц документтæ, цæуынц æркаст æмæ уадзынц сæ фæллад. Проект æххæстгонд æрцыд йе мгъуыдæй раздæр 2023-æм азы. Фæрогдæр кодта арæны куыст, фæзынд ног куысты бынæттæ. Бæстондæр радзурдзæн Хъайтмазты Дзерассæ.
Электрон рады лæугæйæ, транзитон уæзласæнтæ цæуынц таможняйы-логистикон комплекс «Южные ворота»-мæ. Ам шофыртæн сæ бон у хъæугæ документтæ снысан кæнын, ацæуын автомобильты æркасты процедурæ, баулæфын æмæ абалц кæнын. 2023-æм азы республикæйы инвестицион советы уынаффæмæ гæсгæ ацы проект нымад æрцыд ахсджиагыл.
Комплекс «Южные ворота» кæронмæ фæуын фæнд кодтой 2027-æм азы. Фæлæ проект раздæр æххæстгонд æрцыд. 80 мин квадратон метры онг фæзуаты ис 550 уæзласæн машинæйæн бынат, таможняйы цæстдарды цы товартæ сты, уыдон æвæрынæн агъуыстытæ. Ам æххæстгонд цæуынц, Уæрæсейы арæныл хизгæйæ таможняйы цы æмбæлы, æппæт уыцы операцитæ.
Комплексы территорийы ис Дзæуджыхъæуы таможняйы пост, таможняйы оргæнты, ветеринарон æмæ фитосанитарон цæстдарды федералон службæйы, фæдзæхстадон компаниты минæвæрттæ.
Комплексы ис фитосанитарон цæстдарды лаборатори. Дæрддзæф скълады зайæгхалы продукци бæлвырд кæнынц паразиттæй. Хицæнæй радих кодтой 3 бынаты мобилон инспекцион-æркæсæн комплексæн.
Инвестпроектмæ гæсгæ арæзт æрцыд 100 куысты бынатæй фылдæр. Горæты бюджетмæ хъуамæ бацæуа 3 милуан сомæй фылдæр. Схардз сæ кæндзысты социалон фарстатæ лыг кæныныл.
