Уæлдай хъахъхъæнинаг æрдзы бынæттæ аив кæнын, зонадон иртæстытæ, сæйрагдæр та – экологон æмæ медиаволонтерты архайд
Цæгат Ирыстоны æххæстгонд æрцыд проект «Фæсивæды зонадон экспедици «Фæдзæхст Кавказ». Уæлдай хъахъхъæнинаг æрдзы бынæттæ аив кæнын, зонадон иртæстытæ, сæйрагдæр та – экологон æмæ медиаволонтерты архайд. Уымæй уæлдай ма фæдзæхст бынаты æмбырдгонд цыдысты рæсугъддæр къамтæ æмæ видео æрмæджытæ. Журналисттæ, къамтæ æмæ видеоисджытæ, дизайнертæ, нывгæнджытæ æмæ экскурсоводтæ бакодтой стыр ахадгæ куыст Национ парк «Алани»-йы. Уыдоны иу кæнынц патриотизм æмæ уарзон цæстæнгас æрдзмæ. Мадзалы архайдтой, 18 азæй 35 азы онг кæуыл цæуы, ахæм специалисттæ æмæ волонтертæ. Проект царды уагъд æрцыд фæсивæды хъуыддæгты федералон агентад «Росмолодеж»-ы гранты руаджы.
Екатерина Лучина 5 азы размæ райдыдта къамтæ æмæ видеоисыны куыст кæнын. Уый Цæгат Ирыстонмæ иннæ волонтертимæ ссыд проект «Фæсивæды зонадон экспедици «Фæдзæхст Кавказ»-ы архайыны тыххæй. Уыдоны хæс уыд фæдзæхст бынатæн къамтæ æмæ видео æрмæджытæ æмбырд кæнын. Семæ сластой зынаргъ техникон фæрæзтæ – дронтæ, къамисæнтæ, веб-камерæтæ. Проекты тыххæй Екатеринæ баззыдта интернетæй. Балæвæрдта курдиат æмæ афтæмæй сси йæ архайæг. Волонтертæ уыдысты нæ бæстæйы алы регионтæй. Цæмæй нæ республикæйы рæсугъддæр бынæттæ сиса, уый тыххæй. Екатеринæйы фæндаг уыд даргъ. Иркутскæй йæ Цæгат Ирыстонмæ бахъуыд 6 мин километрмæ хæстæг фæцæуын.
Проект «Фæсивæды зонадон экспедици «Фæдзæхст Кавказ»-ы архайдтой 15 адæймаджы. Уыдон дихгонд æрцыдысты цалдæр къордыл. Медиа æрмæг чи æмбырд кодта, уыдонæй уæлдай ма дзы уыдис æрыгон ахуыргæндтæ дæр. Уыдон бæрæг кодтой, туристтæ цы экологон фæндæгтыл фæцæуынц, уыдон сæ фæстæ цавæр уавæрты ныууадзынц, уый. Ацы къорд сбæлвырд кодта иуæй иу рæтты зайæгойты ивддзинæдтæ. Уыцы куыст хъæуы, рекреацион уæз фæкъаддæр кæнынæн. Уымæй уæлдай ма ацы къорд Национ парк «Алани»-йæн æмбырд кодта гербаритæ дæр.
Иртасæн куыст чи кæны, уыдоны хæс уыд, туристтæн цымыдисаг цы экологон къахвæндæгтæ уаиккой, ахæмтæ сбæрæг кæнын. Уыдонæй иу у Танайы цъитимæ æмæ æхсæрдзæнтæ Галдоридон æмæ Æртæ хомæ маршруттæ. Ахуыргæндты къорд систа къахвæндæгты æмæ бынæттон æрдзы видео æрмæджытæ.
Зонадон экспедицийы уыдысты нывгæнджытæ дæр. Чызджытæ ныффыстой тынг рæсугъд пейзажтæ. Фæстæдæр уыцы куыстытæй скæндзысты Национ паркæн открыткæтæ. Проект «Фæсивæды зонадон экспедици «Фæдзæхст Кавказ» царды уагъд æрцыд фæсивæды хъуыддæгты федералон агентад «Уæрæсейы фæсивæд»-ы гранты руаджы. Кусын ыл райдыдтой фарон сæрды. Проекты разамонæг Максим Репецкий фæззæджы æмæ зымæджы дæргъы æмбырд кодта волонтерты æмæ куыстæн хъæугæ æрмæг.
Фæсивæды Уæрæсейы алы регионтимæ зонгæ кæнын у проекты сæйраг хæстæй иу. Йæ саразджыты хъуыдымæ гæсгæ экологон туризм хорз ахъаз у æрыгæтты зæрдæты патриотон ахаст æвзæрын кæнынæн. Фæсивæды зонадон экспедици «Фæдзæхст Кавказ» у уникалон проект. Æххуыс у нæ республикæйæн æрмæст йæ туристон къабазы райрæзтæн нæ, фæлæ ма йæ зонадонæн дæр. Иртасæн куыстгæнджытæ ма Цæгат Ирыстонмæ ссæуын фæнд кæнынц ног азы дæр.
