Республикæ ис, ацы проект царды кæм уадзынц, бæстæйы уыцы фыццаг регионты хыгъды.
Цæгат Ирыстоны æххæстгонд цæуы федералон проект «СВОй бизнес» сæрмагонд æфсæддон операцийы архайджытæн æмæ сæ бинонтæн. Базонгæ сæ кæнынц амалхъомдзинады бындуртимæ, цæмæй сæ бон уа хи хъуыддаг байгом кæнын. Республикæ ис, ацы проект царды кæм уадзынц, бæстæйы уыцы фыццаг регионты хыгъды.
Проект «СВОй бизнес» æххæстгæнгæйæ сувенирон продукци цæттæ кæныны куыстуат бабæрæг кодтой сæрмагонд æфсæддон операцийы архайджытæ æмæ сæ бинонтæ. Сæ *хсæн – хæстон цауты ветеран Елхъанаты Сергей дæр. Уый уыд, 2022-æм азы Украинæйы территоримæ фыццаг чи бацыд, уыдонæй иу. Сергей цы отряды хыгъды уыд, уый штурмгæнæн уыд æмæ архайдта Херсоны æмæ Запорожьейы тохты. Æфсæддон хæстæ æххæстгæнгæйæ фæцæфтæ ис. Ныртæккæ Сергей ис сæхимæ. Сфæнд кодта хи хъуыддаг байгом кæнын. Ис æм фидæны бизнесæн хъуыдытæ дæр.
Проект «СВОй бизнес»-ы архайджытæ бабæрæг кодтой сывæллоны райрæзты центр дæр. Ам æххæстгонд цæуы 3-йæ 15 азы онг кæуыл цæуы, ахæм сывæллæтты алывæрсыг райрæзт: скъоламæ цæттæдзинад, раграйрæзт, уыимæ англисаг æвзаг ахуыр кæнын, хореографи æмæ нывкæнынад. Ацы хъуыддаджы сæрмагонд æргом здæхт цæуы рæзгæ фæлтæры эмоционалон интеллектмæ. Центры разамонæг Зæнджиаты Ноннæ фидæны бизнесментæн радзырдта йæхи фæлтæрддзинады тыххæй, æмæ амалхъом адæм, фыццаг къахдзæфтæ кæнгæйæ, цавæр зындзинæдтимæ сæмбæлдзысты, уый тыххæй.
Проекты архайджытæн йæ фæлтæрддзинады тыххæй радзырдта нымæтæй дзаумæттæ цæттæ кæныны куыстуаты директор Бзарты Аланæ дæр. Регионы кæддæр æххæстæй цы технологи сæфт æрцыд, уый сног кæнын бантыст президентон грантты фонды æххуысæй. Ныртæккæ куыстуаты ис продукцийы уæрæх ассортимент: сувениртæ, уæлæдарæс, гауызтæ. Арæзт цæуынц дæсныйадæвдисæг ахуыртæ, фыццаг къахдзæфтæ чи кæны, уыдонæн. Проект «СВОй бизнес» æххæст кæны парти «Иугонд Уæрæсе» чысыл æмæ астæуккаг бизнесы райрæзты федералон корпораци æмæ æхсæнадон организаци «Опора России»-имæ иумæ.
Ацы проектмæ гæсгæ сæрмагонд операцийы архайджытæ æмæ сæ бинонтæ базонынц бизнесæн æххуысы гæнæнты тыххæй – лæвар ахуыр кæнынæй æмæ консультацитæй льготæтæм гæсгæ финанстæ райсыны онг. Нымæцон сервисты фæрцы амалхъом адæмæн сæ бон æххуыс райсын у, бæстæйы цавæрфæнды регионы уæвгæйæ. Цæгат Ирыстон сси, программæ æххæст кæнын кæм райдыдтой, ахæм æртыккаг пилотон регион. Раздæр архайын райдыдта Рязаны æмæ Татарстаны. Фидæны хъуамæ аххæсса Уæрæсейы æппæт субъекттыл.
