Бæстон ныхасы архайдтой вице-премьер Александр Реутов, профилон министры хæстæ æххæстгæнæг Тебиаты Сослан, æмæ медицинон ахуыргæнæндæтты разамонджытæ
Цæгат Ирыстоны æнæинздзинадхъахъхъæнынады системæйы фарстатыл æрныхас кодтой, Дзанайты Барисы разамындæй æмбырды. Бæстон ныхасы архайдтой вице-премьер Александр Реутов, профилон министры хæстæ æххæстгæнæг Тебиаты Сослан, æмæ медицинон ахуыргæнæндæтты разамонджытæ. Дзанайты Барис куыд загъта, афтæмæй коронавирусы пандемия зынгæ ивддзинæдтæ бахаста республикæйы æнæниздзинадхъахъхъæнынады системæйы куыстмæ. Медицинон кусджытыл æрынцад стыр уаргъ. Уыцы-иу рæстæг тæссаг инфекци раргом кодта бирæ лыггæнинаг фарстатæ, æмæ уыдоныл ныртæккæ хъæуы кусын. Бирæ куыст цæуы, цæмæй сног кæной дзæбæхгæнæндæтты инфраструктурæ. Хъæуты арæзт цæуынц фелшырон-акушерон пункттæ. Сæйрагдæр у – адæмæн хæрзхъæд медицинон лæггæдтæ кæнын. Зындгонд хирург Тотыккаты Валерий куыд радзырдта, афтæмæй регионы фæтыхджындæр кæнын хъæуы хирургон службæ. Уымæн та хорз ахъаз фæуыдзæн районты хсæн профилон центр саразыны хъуыддаг. Иннæ лыггæнинаг фарста – фæлтæрдджын кадрты дефицит. Алыг кæнæн æй ис – специалисттæн социалон пакет æмæ льготæтæм гæсгæ цæрæнуæттæ дæтгæйæ. Медицинæйы рæзтыл кусгæйæ, ахсджиаг у алкæйы фæлтæрддзинад дæр хынцын, загъта Дзанайты Барис.
