Дондзæуæн хызтæ заууатмæ æрцыдысты 80%
Цæгат Ирыстоны æнæрлæугæйæ куыст цæуы донæй ифтонг кæныны объекттæ сцалцæг кæныныл. Дондзæуæн хызтæ заууатмæ æрцыдысты 80%. Уымæ гæсгæ, дон кæны дзæгъæл калд. Афæдзы кæронмæ фæнд кæнынц куыстытæ баххæст кæнын. Ныртæккæ специалисттæ цы уавæрты архайынц, æмæ сæ цы къуылымпы кæны, уый тыххæй бæлвырддæр радзурдзæн Касаты Наирæ.
Хæтæлы гыццыл аиппдзинад, æмæ йæ алыварс æнæхъæн цад. Йæ бахус кæнын та æнцон хъуыддаг нæу. Цæмæй къуылымпыдзинад алыг кæнай, уый тыххæй та гыццыл тыхтæ нæ хъæуы. Фыццаг уал хъæуы, хъыгдард чи баййæфта, уыцы уаццаг æрæхгæнын, дон сцъирын, æмæ йæ уый фæстæ бандзадзын. Дон цæуы бирæ рæттæй, зæгъынц специалисттæ. Фæлæ цæрджытæн сæхи аххосæй дæр фæзыннынц.
Куыстытæ, бæргæ, къаддæр уыдаиккой, конструкциты уавæр бынтон заууат куы нæ уыдаид, уæд. Кусæнгæрзтæ саразын стыр хъуыддаг нæу. Фæлæ уал уыцы куыстытæм бахæццæ уæвын хъæуы. Цæрджытæн рагæй дæр бырондон чи сси, уыцы пырх цъайы аххосæй, куыстытæ бæлвырд къуылымпы кæнынц.
Хъаст кæнынц æнæхъæн горæты цæрджытæ дæр. Специалисттæ алы фарстайыл дæр кусынц æвæстиатæй. Фæлæ бирæ хæттыты кусджытæй аразгæ дæр нæ вæййы. Дон дзæгъæл калд кæй кæны, уымæн йæ аххоссаг у кусæнгæрзæ рæстæджы цыдимæ кæй нал бæззынц, уый. Хъæуы сæ баивын.
Зындзинæдтæ ма æвзæрын кæны уый дæр, æмæ республикæйы ацы фарста алыг кæнæн ис, æрмæстдæр иунæг ахæм сæрмагонд техникæйы иуæгæй. Цыбыр ныхасæй æнæ уæлæмхасæн кусæнгрæзтæй хъуыддаг йæ бынатæй нæ базмæлдзæн. Материалон-техникон æгъдауæй куыстуат сифтонг кæнын нысан кæнынц хæстæгдæр рæстæг.
