Афтæмæй пъланмæ гæсгæ пациентты рæстæгмæ нæ исынц æрмæстдæр тагъд æххуысы клиникон рынчындоны цалдæр хайады
Цæгат Ирыстоны æппæт сæйраг медицинон куыстуæттæ дарддæр æххæст кæнынц сæ лæггæдтæ. Республикæйы æнæниздзинадхъахъхъæнынады министр Годжысаты Тамерлан куыд бамбарын кодта, афтæмæй пъланмæ гæсгæ пациентты рæстæгмæ нæ исынц æрмæстдæр тагъд æххуысы клиникон рынчындоны цалдæр хайады. Уый баст у уыимæ, æмæ дзы нæ фаг кæнынц кадртæ. Уымæн æмæ анестезиологтæ æмæ реаниматологтæ кусынц ковид-стационарты.
Ныртæккæйы онг стационарты ис 1344 пациенты, Covid-19-ы æмæ пневмонияйы диагноз кæмæн сæвæрдтой, уыдонæй. Годжысаты Тамерлан куыд загъта, афтæмæй зындзинæдтæ æййафынц колл-центры куыстæй, дзæнгæрджытæн дзуапп дæттынц 14 адæймаджы. Ныртæккæ архайынц центры куыст фæахадгæдæр кæныныл, цæмæй тыхст адæм операторты дзуапмæ 2 минутæй фылдæр ма æнхъæлмæ кæсой, уый тыххæй. Транспортон фæрæзтæй цух не ййафынц.
