Ныридæгæн республикæйы кусы 180 скъолайы музейы æмæ намысы къуымы
Цæгат Ирыстоны æппæт скъолаты фæзындзæн не мзæххонты – Уæрæсейы хъæбатырты номыл иумæйаг стендтæ. Республикæйы сæргълæууæг Сергей Меняйлойы хæслæвæрдмæ гæсгæ ахуырады æмæ наукæйы регионалон министрады специалисттæ бакуыстой иумæйаг хуызыл. Ныридæгæн республикæйы кусы 180 скъолайы музейы æмæ намысы къуымы. Бæлвырддæр радзурдзæн Хъайтмазты Дзерассæ.
Скъолайы æнусонгонд намыс. Алы фæлтæрты зæрдæты чи цæры, уыцы сæрыстырдзинад. Алы рæстæджыты тохты хъæбатыртæ æмæ се стыр сгуыхтдзинæдтæ рохуаты нæ баззайдзысты. 9 азы дæргъы 26-æм скъолайы архайынц проект «Намысы вахтæ»-йыл. Йæ автор Мхциаты Маринæ хистæркъласонтимæ æрвылаз бацæттæ кæны ног стендтæ.
Раздæры æмæ ныры бонты хъæбатырты сгуыхтдзинæдты тыххæй ам алчидæр зоны. Скъолайы æртыккаг уæладзыг цыма ивгъуыдмæ портал у, уый хуызæн.
Республикæйæ раæугæ Уæрæсейы Хъæбатыртимæ баст иумæйаг стендтæ скъолаты гом кæнынц, Цæгат Ирыстоны сæргълæууæг Сергей Меняйлойы указмæ гæсгæ. Рæзгæ фæлтæры хъомыладмæ 26-æм скъолайы сæрмагонд æргом здахынц. Арæх дзы арæзт фæцæуынц Фыдыбæстæйы Стыр хæсты, сæрмагонд æфсæддон операцийы архайджыты сгуыхтдзинæдтимæ баст мадзæлттæ.
Тарскæйы 2-æм скъолайы æрмæст стендтæ нæй, фæлæ Фыдыбæстæйы Стыр хæсты æмæ сæрмагонд æфсæддон операцийы музейтæ. Ам ис хуызистытæ, сгуыхтдзинæдты тыххæй информаци, хъæуы чи райгуырд æмæ схъомыл, уыцы хъæбатырты дзаумæттæ. Зæгъæм, сæрмагонд операциимæ баст агъуысты лæууы хъæбатыр Тедеты Гермæны партæ – уыд ацы скъолайы рауагъдон, фæмард хæстон цауты райдиан. Директор Тъехты Дунессæ куыд зæгъы, афтæмæй хъæбатырты рох кæнын нæй.
Ахæм патриотон хъæппæристы фæрцы бантысдзæн Фыдыбæстæйы хъахъхъæнджыты тыххæй намыс фидæны фæлтæртæм фæхæццæ кæнын.
