Æрныхас кодтой ацы къабазы райрæзтыл, цы риссаг фарстатæ ис, æмæ сæ куыд алыг кæнын хъæуы, ууыл
Цæгат Ирыстоны æрдзон æвæрæнтæй пайда кæныны фарстатыл æрдзырдтой, Парламент цы æмбырд сарæзта, уым. Æрныхас кодтой ацы къабазы райрæзтыл, цы риссаг фарстатæ ис, æмæ сæ куыд алыг кæнын хъæуы, ууыл. Æрдзон æвæрæнты æмæ экологийы министры хæдивæг Тетцойты Алан раныхас кодта докладимæ. Куыд радзырдта, афтæмæй республикæйы хæххон хайы сты граниты, мраморы, доломиты æмæ æндæр æвæрæнты гуырæнтæ, быдырон хайы та – змисты, æлыгы, хуыры гуырæнтæ. Афæдзы райдианы бæрæггæнæнтæм гæсгæ, Цæгат Ирыстоны территорийы архайы, бынæттон нысаниуæг кæмæн ис, æрдзон æвæрæнты ахæм хæйттæй пайда кæнынæн 76 лицензийы, æмæ 133 лицензийы – зæххы бынæй æдзæхх дæттæ исынæн. Парламенты спикер Тускъаты Таймураз куыд загъта, афтæмæй æвæрæнтæй пайда кæныны къабаз ахсджиаг бынат ахсы экономикæйы райрæзты, уыимæ хъæуы сæрмагонд æргом здахын сæ хъахъхъæнынмæ.
