Йæ фæлгæты уыд ирон культурæйы бон. Программæмæ хаст æрцыдысты ирон адæмы национ æууæлтæ. Адæмон зарджытæ, кæфтытæ, уацмыстæ.
Цæгат Ирыстоны æрмдæснытæ архайдтой фестиваль «Уазæгуарзон Кисловодскы». Йæ фæлгæты уыд ирон культурæйы бон. Программæмæ хаст æрцыдысты ирон адæмы национ æууæлтæ. Адæмон зарджытæ, кæфтытæ, уацмыстæ… Уæлдай тынгдæр уазджыты зæрдæмæ фæцыдис рагон ирон хæринæгты равдыст. Уымæй уæлдай, фестивалы архайджыты базонгæ кодтой ирон фысджыты сфæлдыстадимæ. Кисловодскы уыди не сфæлдыстадон къорд дæр.
Фыццаг рахызт сценæмæ, æмæ Нарзаны галерейы азæлыд къухæмæдзæгъд. Адæмон зарджытæ, кæфтытæ æмæ куыд фæзæгъынц, хæхты зæлтæ, арфæйы ныхæстæ æмæ цины æнкъарæнтæ. Кисловодскы уыдис ирон культурæйы бæрæгбон.
Аæдмон кæфтыты ансамбльтæ «Ирыстон», «Алания», «Исток», вокалон къорд «Хъуыбады», республикæйы адæмон артисткæ Хуытыгаты Маринæ, Мамед Алискеров æмæ æндæртæ. Цæгат Ирыстоны зындгонд артисттæ ивынц иу иннæйы. Ирон культурæйы радысты та – традицион чъиритæ, рагон хæдзары дзаумæттæ, бронзæйæ конд хæцæнгарз.
Фестиваль «Уазæгуарзон Кислводск» сæмбырд кодта сæдæгай адæмтæ. Уыдис дзы куыд бынæттон цæрджытæ, афтæ туристтæ дæр. Уазджытæн бацæттæ кодтой национ хæринæгтæ, радзырдтой сын фынджы уæлхъус хи дарыны æгъдæуттæ, базонгæ сæ кодтой ирон фысджыты уацмыстыимæ.
Кисловодскы ахæм æмвæзады культурæйы фестиваль скæныны хъæппæрис разынди Стъараполы крайы ирон æхсæнадмæ. Диаспорæйы разамынд æдзух йæ цæст дары бынæттон ирæтты хихъæппæрисадон къордтæм, æмæ сын æххуыс кæны.
Кисловодскы ирон диаспорæйæн бындур æвæрд æрцыди 30 азæй фылдæры размæ. Уыцы рæстæгмæ сæ къухы бирæ хъуыддæгтæ саразын бафтыди. Се ргом тынгдæр арæзт у ирон æвзаг, культурæ æмæ æгъдæуттæ бахъахъхъæнын. Фæлæ афæдзæй-афæдзмæ уый зындæр у, зæгъынц хистæр фæлтæр. Уымæ гæсгæ, ахæм мадзæлттæ стыр æрвылазон.
