Культурæйы дæсгай кусæнуæттæ сæ дуæрттæ байгом кодтой аивадуарзджытæн
Цæгат Ирыстоны арæзт æрцыд акци «Аивæдты æхсæв». Культурæйы дæсгай кусæнуæттæ сæ дуæрттæ байгом кодтой аивадуарзджытæн. Тугъанты Махарбеджы номыл музейы бацæттæ кодтой равдыст «Заронты сезонтæ. Фенын, Фехъусын, Банкъарын». Экспозицийы фенæн ис Уæрæсейы сгуыхт нывгæнæг Павел Зароны 50 куысты: Ирыстоны пейзажтæ, портреттæ, традицион нывтæ. Алы куыстæй дæр цæуы хæрздæф. Бакуыста йыл республикæйы парфюмерон кампанитæй иу. Æвзæр чи уыны, уыдонæн та бацæттæ кодтой, андзæвæн куыл ис, ахæм нывты модельтæ. Брайлы шрифтимæ. Пушкины номыл музейы филлиалы арт-резиденцийы та байгом равдыст «Аланика Teens». Бакуыстой йыл аивадон лабораторийы минæвæрттæ. Экспозицийы фенæн ис бинонты къамтæ, æрмдæсныйады хуызтæ, алы мигæнæнтæ. Алыхуызон аивадон формæтæм гæсгæ, æрыгон автортæ æыдисынц сæхи цæстæнгас аивадмæ.
